Zothlifim Logo
Loading ...
Mizoram NewsMizoram News

Leilung lam mithiamte chuan Aizawl khawpui-a in ding zawng zawng deuh thaw hi leimin vanga chhe thei din-hmunah a ding niin an sawi.
Laipuitlang-a chhiat tawhna rapthlak tak thleng chungchanga zawhna chhang-in Geology and Mineral Resources Joint Director Dr H.Lallenmawia chuan Aizawl veng tam bera leilung hi a himlo hle niin a sawi a. A hmun a awih a, chawhrualin degree 35 chuanga awih a ni a ti a. A awih bakah ruahtui a tam a, tuihawk luankawr leh tuichhe paihna (drainage and sewearage) mumal a awm lova lei chhung rem lai lai-ah tui a lut reng a. A leilung hrim hrim (geological setting) hi a \ha lova a sakhat lova, chuvangin leimin a tam em em a ni a ti.
In sak dan kawnga sorkarin dan a siam ‘Building By-Law’ in zawm a hlawhlo niin Dr Lallenmawia chuan a sawi a. In satute’n a foundation an laihin lung chang awmna an lai thleng thin lo te, insakna hmanraw \halo an hman avangte pawhin Mizoram ang leilung nghetlo leh thawlah chuan leimin leh lirnghing vangin chhiatna rapthlak tak a thleng thei a ni a ti. In sakna atana iron rod hman tam tak hi iron rod \ha nilo re-rolling machine hmanga thirchhia leh \in chhia vel her nawn a\anga siam a ni a, hei hi a himlo hle niin a sawi a. Chubakah cement pawlh dal hman te, cement, balu leh rawra inpawlh tawk dik tak hman loh te, concrete tui leih tam tawk lohte a pawi thei hle a ni a ti a. A ruangam siam danah a leilung ngheh leh ngheh loh ngaihtuah lova rit lutuk-a sak te a hlauhawm bik a, duh ang anga in sak a, duhna hmun hmuna sak mai hian him lohna a thlen a ni a ti. In sa tur reng rengin an sakna hmun tur leilung a him tawk leh tawk loh helam mithiam (geologist) te rawn thin se a duh thu Dr Lallenmawia chuan a sawi a ni.