Inrinni zing dar 3 vela ruah nasa tak sur leh thli na tak tlehin Laipuitlanga leimin rapthlak tak thlenna hmun chu Chief Minister Pu Lal Thanhawla chuan a hriat veleh Inrinni zing vek khan a hmunah a tlawh nghal a. Chief Minister chuan chhiatna rapthlak tak thleng chu pawi a tih tak zet thu sawiin, nunna hlu tak leh chenna in chan ta chhungte a tawrhpui hle tih a sawi a. Tanpuina leh chhawmdawlna awm thei ang ang pawh sawrkarin a ngaihtuah nghal tur thu a sawi.
Chief Minister hian Inrinni vek khan he chhiatna thleng hi central sawrkar hotute lehkha a hrilh nghal bawkin thlalak engemaw zah thawn tel a ni a.
Thli leh ruahpui sur hian Chief Minister bial Thenzawlah in 20 chuang a tihchhiat bawk avangin Inrinni vek khan a hmun Pu Lal Thanhawla chuan a tlawh nghal tih sawrkar thuchhuah chuan tarlangin, tlawmngaia hnatlangte thingpui lumna tur sum a pe bawk a ni
