Mizoram News

Dân te hlawhtling taka kenkawh harsatna a awm ṭhin:CM

Chief Minister Pu Lal Thanhawla chuan drugs hmansual hi khawtlang tan hnawksak mai nilovin ram hmasawnna thleng tithuanawp thei a ni a ti a. Dân te chu awm bawk mahse, hlawhtling taka kenkawh erawh harsatna a awm thin a ni, a ti.

Nimina Mizoram sawrkar Social Welfare Dept leh United Nations Office on Drugs and Crime (UNODC) ṭangkawp ina a buatsaih, ‘Consultation Meeting on Review of the Mizoram State on Drug Policy’ tih I&PR Conference Hall-a neih hmanpuinaah he thu hi sawiin, Chief Minister chuan Mizoramin ramdang, Myanmar leh Bangladesh te nen inkalpawhna awlsam tak, border thui tak a intawm avangin drugs tawlhruk a awlsam hle a ni, a ti.

Chief Minister chuan Drugs hmansual hi harsatna tam tak thlen thei, hriselna te, vantlang nunte leh dan kenkawh thuah te nghawng a nei vek a ni tiin, Chief Minister chuan tunlai khawvelah chuan hmasawnna kalkawng daltu lian tak a ni, a ti.

Chuvangin mitinin he sualna hi veia a dona kawngah kan tanrual hle angai a ni, a ti. He damdawi hmansualna tipunlun tur hian tunhnaiah pseudoephedrine, phailam atanga rawn tawlhru a, Delhi airporta security an pumpelh theite hi a mak hle a ni a ti a. Tute pawhin bengchhi a, Narcotics Control Bureau Regional Office, Guwahati leh State Office, Imphal te nena kan inpawh reng a pawimawh a ni, a ti.

Chief Minister Pu Lal Thanhawla chuan sawrkar ang te, civil society ang te, tlawmngai pawl leh Mizo kan nih angin kan tanrual a hun a ni, a ti a. He damdawi hmansual leh tawlhrukna hi tih tlema, he harsatna hi a bulpui kan chhut chah a tul a ni, a ti.

Chief Minister chuan UNODC Project Coordinator Kunal Kishore, New Delhi atanga lo tel theih avangin lawmthu a sawi a, Positive Network of Mizoram President Pu K. Lalhmangaiaha’n a dinhmun leh HIV veite dinhmun huaisen taka a sawi chu fakawm a tihthu a sawi bawk a ni.

Khualzahawm Pu P.C.Lalthanliana, Minister of State for Social Welfare pawhin thusawiin, mimal duh thlanna a thil sual tih hi do hneh a har thin a ni tiin, drugs hmansual leh tawlhrukna dona kawngah sorkar aimahin tlawmngai pawl te leh kohhran an tangkai theih a rinawm zawk a ni, a ti.

He consultation meeting in a tum ber chu State drugs policy chungchang sawiho a ni a, abikin damdawi hmang-sualte tana enkawlna dan leh damdawi hmansual chung-changa a kaihhnawih Social Welfare Department, Excise & Narcotics, Health Services leh MSACS te thawhhona tha a awm theihna tur te a ni.

Review meeting-ah hian Kunal Kishore, Project Coordinator, UNODC in Mizoram Legal & Policy Framswork on Drugs – A Review of challenges and opportunuties’ tir thupui powerpoint hmangin a sawifiah bawk a ni.Meetingah hian Mizorama damdawi hmangsual awmzat chhin-chhiahna hnuhnung berah chuan mi 10,750 tih tarlan a ni a, Drugs License cancelled zat pawh 17 a nih thu tarlan a ni bawk.

Consultation Meeting hi Pu Ranbir Singh, Commissioner & Secretary, Social Welfare in a kaihruai a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram