French Open : Venus tla, Somdev tlang

Venus Williams chu French Open First Round-ah Urszula Radwanska hneh lovin a tla nghal a, Venus hi 7-6 (7-5), 6-7 (4-7), 6-4-in a chaklo a ni.

Padwasnka hian Grand Slam title ṭum 7 zet la tawh Venus hi darkar 3 leh minute 20 chhungin a hneh a, Second Round-ah German Qualifier Dinah Pfizenmaier a hmachhawn leh ang.

2008 Champion Ana Ivanovic chuan Petra Martic chu 6-1, 3-6, 6-3-a hnehin Second Round a lut bawk.

Puerto Rican tleirawl, kum 19-a upa, chuan Grand Slam a khelh hmasak bernaah player langsar Nadia Petrova chu 3-6, 7-5, 6-4-in a rawn hneh nghal a, hei hi French Open ṭan ni-a upset lian ber a ni ang.

Kum 32-a upa, Lleyton Hewitt chu Set hmasa 2 a lak hnu-ah Gilles Simon a chak zo lova, Simon hian 3-6, 1-6, 6-4, 6-1, 7-5-in a lehthal leh a ni.

David Ferrer chuan awlsam takin Marinko Matosevic chu 6-4, 6-3, 6-4-in a hneh a, Ferrer hian kum 2003 aṭang khan French Open First Round hi a la paltlang ziah a, hetihlai hian Matosevic erawh hi chuan Grand Slam vawi 9 a khelh tawhah First Round paltlang a la nei lo thung a ni.

Sam Querrey pawh Lukas Lacko 6-3, 6-4, 6-4-a hnehin Second Round a lut bawk.

Tripura tlangval world no.188 Somdev chuan Roland Garros-ah 6-3,6-3,7-5 a Daniel Munoz De La Nava hnehin 2nd round a lut.

He inkhelah hian Indian tlangval hian kawng engkimah a hneh sawh em em mai a,third set-ah hian a talbuai chho dawn emaw tih hnuah hun pawimawh takah Nava service hi a break leh tak avangin chiang takin chakna a chang ta a ni.

Somdev hian 2nd round ah World no.1 hlui Roger Federer a hmachhawn dawn a,an intawn hnuhnung ber tum,2011 Dubai Open-ah khan Roger hi 6-3,6-3 in a lo chak tawh a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram