Peoples Right to Information and Development Implementing Society of Mizoram (PRISM) chuan Laipuitlang in chim / leimin chhiatna thleng chu siam chawpah an ngai a, a tuartute hnenah June 2013 ralhma ngeia chhawmdawlna pe turin Mizoram sorkar an phut.
Inrinni khan Aizawl Press Club ah chanchinbumite kawmin PRISM Vice President Pu Vanrochhuanga chuan Laipuitlang chhiatna chu mihringte siamchawp ah an ngaih thu sawiin kum 2010 atang khan PWD building hi a khi tan tawh a, khawtlang hruaituten vawi engemaw zat PWD te an dawr hnuah nikum October ni 19 khan thiah an phal chauh a. Hemi hnu April ni 2,2013 ah tender tichhuakin April ni 9 ah a thiattu tur hnenah work order pek a ni a. He chhiatna hi building thiahloh vanga thleng a ni tih loh theih ani lo a, he in hi thiah nise chuan hetiang em em a chhiatna nasa hi thlenglo turah an ngai tih a sawi.
Pu Vanrochhuanga chuan PWD building chima a mawhphurtute an phutawk hremna pe tur te, in hmun chante an inhmun hlutna hu pawisa pe tur te, In leh bungrua, motor, two wheeler leh thildang a tih-chhiat sak te a hu tawk pawisa pe tur te, harsatna tawk chhungkua te chhawmdawlna pe tur leh a tul anga Central dawr turin sorkar an phut tih an sawi a, an thilphut hi tih hlawhtlin a nihloh chuan a tul anga hmalak zui zel an tum tih a sawi bawk.
Chanchinbumite zawhna chhangin tunhnaia Chief Minister, Minister leh MLA te in leh lo din dan chhuichiang tura FIR an thehluh chungchangah an behchhan chu inthlan dawna affidavit an siam atangin a nih thu a sawi a. MLA inthlanpui neih hma hian an chhuichhuah hman ngei an beisei thu leh an lo dik anih chuan an tan advantage a ni ve tho a ni, a ti a, a tul dan ang leh an phak ang zelin a dang pawh tih leh tur anih thu an sawi.