Laipuitlang leh Ramhlun Venglai chhiatna rapthlak avanga chhanchhuah hna thawh ni 4-na nimin khan ruang 1 phawrh leh a ni a, tihian ruang lakchhuah tawh zawng zawng hi 16 a a tling tawh a, he thu buatsaih lai hian midang 1 ruang phawrh tuma beih mek a ni.
Ruang zawn hna hi Disaster Response Force ten ngawrh taka chhunzawmin chhun dar 12:30 vel khan Thingfal khua Pi Lalremchhungi (42), Thingfal ruang lakchhuah a ni, a ruang hi post mortem nghalin, an khuaah kalpui a ni. Ani bakah hian Vanlalrema Hnamte, S. Lungpher khua ruang pawh hi hmuh tawh niin, he thu buatsaihlai hian haichhuah tuma beih mek a ni.
Hetihlai hian he chhiatna thlenna hmunhma senghawi hnatlang chu pawh ngawrh taka chhunzawm a ni a, hnatlang tura Central YMA in a bulhnai YMA branch a ruat Ramhlun North; Ramhlun South; Ramhlun Venglai, Ramhlun Vengthar, Ramhlun Sports Complex; Chaltlang; Chaltlang North; Bawngkawn; Bawngkawn Chhimveng bakah Laipuitlang branch te an hnatlang a ni. Chhiattawk puala vehbur khawnah pawh sum thahnem tak luh belh zelin Laipuitlang leh Ramhlun Venglaia dahkhawmna hmunah te hian mimal, Kohhran, pawl ho leh mi thahnemngai thawhkhawm zawng zawng chu cheng nuai 14 a chuang tawh a, Lawngtlai Bazar VC leh YLA te chuan chhiat tawkte pual hian Bawm dawhin, Areopagy-ah Thawhṭanni nileng khan an ṭhutpuia heta mi tlawmngai ten an thawh tlingkhawm hi `1,00,300/- a tling a ni. Nimina chhanchhuahna leh senghawi hnathawktute ei leh in hi SAY Central Corp ten an buatsaih a ni.
Chhiat tawhna hmuna chetlak dan thlithlai hian Mizoram sawrkar mipawimawh engemaw zatin an ṭhutchilh reng a, nimin khan Speaker Pu R. Romawia, Home Minister Pu R. Lalzirliana, Finance Minister Pu H.Liansailova, Revenue Minister Pu J.H. Rothuama, Transport Minister Pu P C Zoram Sangliana, DM & R Minister Pu Nihar Kanti Chakma bakah Parliamentary Secretary te leh MLA ten an thutchilh a ni.
Hetih lai hian Assam Rifles DIG Brig. GAV Reddy, SC chuan Mizoram Chief Minister hnenah thu thawnin chhanchhuah leh senghawi hnathawk tur hian Assam Rifles mite englai pawha an in rin reng thu leh hna pawh an thawh chhunzawm ve zel thu a hrilh a ni.