Mara Autonomous District Council hnuaia VC inthlan chhawng 2-a neih zawhfel taka vote tla te chhiar kim a ni ta a, VC la tam ber Congress party-in VC 44 ah sawrkarna an siam thei ta a ni.
Vote thlak thawh khatna tun thla ni 3-a neih taka VC 5 a vote tla te High Court thu lo anga chhiar nghal a nih avangin inhriatthiamlohna tlem a thleng a, hemi ṭuma vote tla te hi a May ni 11-a chhiar leh tur chu eptu lamin an remti lo a, amaherawhchu nimin khan MADC Executive thu angin MADC Forest Hall ah chhiar a ni ta a, Official result puan ang chuan Chakhei- 1 ah MNF&MDF tangdun leh Congress in seat 3 ve ve an la a, Chakhei-II ah Congress-in seat awm zawng zawng seat 5 an la a, Chakhei III ah Congress-in seat 4 la in an chak bawk a, Siasi ah Congress chuan seat 4 bawk la in, Bymari ah chuan seat 3 an la a, MNF/MDF Coordination in seat 1 an la thung a ni. Tihian a pumpui ah Congress chuan VC 44 ah sorkarna an siam thei ta a ni. Vawiin Vote chhiar ah hian buaina chhuak engmah a awm lova, venhimna erawh uluk taka kalpui a ni.