Zothlifim Logo
Loading ...

Serchhip Joint VC chu nimin khan Serchhip-III a Lalpuithanga Hall-ah ṭhukhawmin MGNREGS hnuaia hnathawh hrang hrangah VC te hriatpuina zela hna thawh ni tawh se an duh.

Nimina Serchhip Joint VC te Lalpuithanga Hall, Serchhip-III a ṭhukhawm hian sawrkar laipuiin thingtlang mipuite tana ni 100 inhlawhna a siam, MGNREGS hnuaia hnathawh hrang hrang chungchang sawihoin Material Component hnuaia hnathawh turah VC te Work Agency-ah hman an nih dawnloh chuan hnathawhna tur area VC te hriatir ṭhin nise an duh thu sawiin, Wages Component hnuaia hnathawhah pawh a tira proposal awmsa nilo thawh a nih dawn chuan VC te biakrawn ṭhin nise an duh thu an sawi a, MGNREGS Wages Component aṭanga Serchhip District SP Quarter panna kawng laih hna thawk tura beisei an nih chungchang chu hetah hian hma la mek VC an lo awm tawh avangin a theih anga tih hlawhtlin nise an ti bawk.

Serchhip Joint VC ṭhutkhawm hi Serchhip-III VC Vice President, Pu C.Lalhminghlua‘n kaihruaiin Serchhip-a Lal Thanhawla Higher Secondary School tan VC tin ten `20,000/- ṭheuh tawh nise tiin Ration Card-ah Retailer No. chauh ziahlan a ni ṭhin chuan kawng hrang hrangah harsatna a siam ṭhin avangin Veng hming pawh ziak lang tawh turin District Civil Supplies Officer (DCSO) ngen nise an ti a, lirthei nei thar register tur ten Garage an neih ngei theihna tura hma an lâknaah Garage nei te hriatpuina ziak tura VCP te ngenna awm ṭhin chu danin VCP te hriatpuina ziah kher hi a phût loh avangin ziah loh nise an ti a, LAD aṭanga Questionaire an dawnah VCP lawmman atan thlakhatah `10,000/- leh a dang zawngah `8,000/- rawt nise an tih bakah Cable TV te Monthly Fee chungchang pawh sawihoin, hemi chungchangah hian hma la mek an awm avangin Joint VC aṭang chuan thutlukna siam loh nise an ti bawk.

Nimina Serchhip Joint VC ṭhutkhawm ah hian member 16 telin Serchhip Town chhunga VC 7 aiawhte an tel kim thei a ni.