Categories
Chanchinthar Mizoram

PRISM-in CM telin MLA 10 lakah FIR an thehlut

PRISM chuan Chief Minister telin, minister leh MLA 10 lakah nimin khan Anti Curruption Bureau ah FIR an thehlut a, Sawrkar Department sum hmangin hmun hrang hrangah in te sa-in, ram te an lei ni a an hriat chu chhuichian ni se an ti a ni.

PRISM thuchhuaha tarlan danin, chhuichian tura an duh te hi Chief Minister Pu Lal Thanhawla leh Speaker Pu R.Romawia bakah minister 3- Pu Lalrinliana Sailo, Pu PC Zoramsangliana leh Pu JH Roṭhuama te, Parliamentary Secretary Pu KS Thanga te, MLA Pu John Siamkunga, Pu Joseph Lalhimpuia, Pu TT Zothansanga leh Pu Lalrobiaka te an ni a, sawrkar hruaitu ṭhenkhat ten in leh lo lianpui pui dina mipui sum hmanga an inhai vur ṭhin chu PRISM chuan ṭha an tilo a, hei vang hian heng mite hi chhuichianga a ṭul anga an chunga action lak a nih theih nana hma la turin ACB-ah FIR an thehlut a ni.

Chief Minister Pu Lal Thanhawla te chhungkaw ram nia sawi, Thenzawl khaw daia Tourism Department Tourist Lodge bul lawkah Fisheries Depatment-in sum tamtak sengin Sangha dil an siam tih sawiin, Agriculture Department pawhin SRI hmangin buhchin an kalpui bawk a. He ramah tho hian In luahlai awmin electric current pawhluh a ni a; amaherawhchu electric bill pakhatmah an chawi lo a ni, an ti bawk a ni.

Pu Lalrinliana Sailo, Minister hian Pu David M.Thangliana lehkhabu ziah ‘Lal Thanhawla’ tih a published a, hei hi office of profit kalh nia an hriat avangin chhuichian nise an ti bawk.

By Editor

C.Lalrochhuanga,
New Serchhip, Serchhip - 796181
Mizoram
Contact: WhatsApp | Phone Call | Telegram