Chief Minister Pu Lal Thanhawla’n Mizoram district danga sawrkar hnathawk ten Job Card an nei thei anih chuan Kolasib district-in an neih theih lohna tur a hre lo tih a sawi a, sawrkar hnathawk ṭhenkhatin remti loa do tlat an awm a nih chuan a hrilh tur thu a sawi.
He thu hi Kolasib Diakkawn YMA Halla Kolasib District Joint Village Council Assembly vawi 1-na a hmanpuinaa a sawi a, hemi hmaa Kolasib Dist Jt VC rorel inkhawm chuan, Kolasib dist chhungah sorkar hnathawk te job card paih sak anih laiin dist dangah sorkar hnathawk te pek an nih avangin, an dist ah poh sorkar hnathawk ten job card an neih theih nan hmalak ni rawh se tih resolution siamin an pass a, hei hi Chief Minister chuan chhangin, MGNREGA hnathawh chungchangah VC te an fimkhur tul a tih thu a sawi a, VC te zingah material component tamtak pachhiat phah an awm a ni a ti.
Chief Minister chuan hun kal zelah VC te hnathawhna tur sum te a tam chho ve zel a, kuttling lova sum lak tum lo tur leh mipui rawngbawltu an ni tih hre reng turin a chah a. Khawtlang nun siam thatna ah mawh thui tak an phurh thu leh hei hian kohhran nun thleng a nghawng thei a ni a ti a. Sorkar hmalakna, abikin NLUP a kalpui mek chu a hlawhtlinnaah thui tak mawh an phur a ni tih hria a neitu rilru nen thawk thin turin a chah bawk a ni.
Assembly session hmasa lamah resolution 8 an pass zingah VC leh Village Employment Committee te inkara harsatna awm thin sutkian te, VC lawmman phu tawk siam, district pum chhunga Higher Secondary School pakhat tal dah te, Kolasib district hospital tih changtlun, Kolasib district water supply siam that leh Kolasib town road development kalpuite a tel a ni.
Chief Minister hi bialtu MLA Art & Culture Minister Pu P.C.Zoramsangliana, Serlui bialtu MLA Pu K.Lalrinthanga leh Tuirial bialtu MLA Pu Hmingdailova Khiangte ten an tawiawm a ni.