Aizawl Laipuitlang leh Ramhlun venga chhiatna thlenga thi chhungte hnenah sawrkarin `1,50,000/- a pe dawn a, hliam te chu an hliam nat dan a zirin a ṭanpui dawn bawk a ni.
Nimina Chief Minister Pu Lal Thanhawla hova a office-a sawrkar hotute ṭhukhawm chuan hemi chungchang hi sawi hovin, pucca building chhe vek neitu hnenah `35,000/- tanpuina pek ni se an ti a, hei hi chhiatna thlen thulha inkaihhruaina dan-in pek tura a tih chin a ni.
Meeting-ah hian he chhiatna thlen avanga a mawhphurtu chhui chhuak tura Magisterial Inquiry din chungchang pawh sawiho a ni bawk a ni. Chhiatna hmunah chhanchhuah hna thawktu State Disaster Response Force chu MAP Battalion leh IR Battalion te atanga thlangin, kum 2010 May – June thlaa CTI Sesawnga training chhuak te an ni a, hetiang training chhuak hi mi 376 an ni tih tarlan a ni a, Chief Minister chuan police te mai bakah Engineer te leh departmental mite pawhin training nei ve se tha a tih thu a sawi a ni.
Meeting-ah hian Chief Secretary charge latu Pu Ashwini Kumar, Principal Secretary to Chief Minister Pu Lalram Thanga, DGP Pu Alok Kumar, DM&R Secretary Pu P.C.Lawmsanga leh Chief Scientific Officer Dr.Vanlalzara leh Press Secretary to Chief Minister Pu L.R.Sailo te an tel a ni.
Chief Minister Pu Lal Thanhawla’n chhiattawkte chhawmdawlna a theih chin chinah a ngaihtuah zel a ni tur thu sawiin, thlamuang taka awm turin a chah a.
Thlichhia leh ruahpui nasa tak avanga tun inrinni zingkara Laipuitlanga chhiatna nasa tak a thlen chungchanga thuchah siamin Chief Minister chuan Laipuitlanga chhiatna rapthlak tak thleng chu a vanduai thlak tak zet a ni, a ti a, he chhiatna thlennaa mawhphurtu chhui turin Aizawl DC Pu Franklin Laltinkhuma kaihhruai Magisterial Inquiry din anih thu leh ni sarih chhunga report thehlut tura hriattir an nih thu a sawi a ni.
Chhanchhuah hna thawktu State Disaster Response Force te, tlawmngai pawl YMA leh tlawmngai thawktu zawng zawngte changah lawmthu a sawi a. Chhanchhuah hna thawktute tibuai lova, thuawih taka mipuite an inthunun avangin lawmthu a sawi bawk a ni.