Niminpiah chhuna Mizoram hmun ṭhenkhata thli natak leh ruah thawk chuan thil tihchhiat a nei nual a, Serchhipah chuan in 10 luah tlak lovin a sawp chhe vek a, mi 5 in hliam an tuar.
Hriat theih chinah in sawp chhia te hi Serchhip field vengah 4, Veng chungah 3 leh medical quarter 2 a ni a, inchung hawk 7 a awm bawk a, in chhe tenau ṭhahnem tak a awm bakah hmun hrang hrangah thing zar leh thing len tluk a nei nual a, hliam tuar te hi an na lutuk lo a, an zinga 2 te chu damdawiinah inenkawl tura admit an ni a, an pahnih hian hmeichhia ve ve an ni.
Khawpui chhungah electric ban 5 a tlu a, thingtlu in electric hruai a vuak chhiat hmun tamtakah a awm bawk avangin Serchhip khawchhungah power supply a awmlo a, nizan hmasa khan veng tam zawk chuan êng an nei thei lo a ni.
Thliin a tihchhiat in thawm ṭhat hna nimin khan khawtlang huapa hnatlanga thawh a ni a, chhiat tawk te ṭanpuina awm thei ang te sawrkarin a ngaihtuah sak a ni.
Inchhia zawng zawng hi 23 a ni a, heta tan hian DC Office chuan `1,80,000/- a semral a, chenna in chhe vek 9 te hnenah `15,000/- ṭheuh a pe a ni. Hnatlang thingpui lum nan Chief Minister, bialtu MLA ni bawk Pu Lal Thanhawla chuan Field Vengah `10,000/-, Vengchung leh Chhim Vengah `5,000/- ve ve a pe a, Insak hnatlang hi an awmna VC ten ko in nimin khan mi ṭhahnem tak an thawkchhuak a, ruahman ang chuan vawiinah chhunzawm leh tur niin, electric ban tlu tundin leh hna pawh P&E staff ten ngawrh takin an thawk nghal a, nizan khan êng pek hman leh a ni.