Central YMA chuan Vaphai leh Saikhumphai inkar boruak \ang takin daih lam a pan hma chu mihring nunna chan mai hlauhthawn thil thuah a pawl ang emawa vehbur khawn rih lo turin ngenna a siam leh.
Central YMA hruaitute hian nimin chhun khan an pawl office Committee Room-ah MJA member te thingpui inpuiin Saikhumphai leh Vaiphai inkar boruak an hmuh dan an sawifiah a, CYMA President Pu T.Sangkunga chuan, Vaiphai leh Saikhumphai inkarah inepna boruak a la awm zui zel avangin an dinhmun hi fimkhur taka thlirzui a ngai a ni a ti a, khaw 2 inkar boruak zirchiang tura an palai tirh Central YMA Asst. Secretary Pu RL Rindika bakah CEC member Pu Roneihthanga leh Pu Vanlalsawma te report nizan hmasaa an ngaihthlak hnu a nizan hmasa veka CEC \hu-khawm chuan, helai hmun hi ruihhlo, ralthuam leh thil dang tawlhrukna hmun a nih avangin, boruak sosang karah tuemaw in ralthuam emaw thil dang emaw cheleka Mizo leh Mizo inkarah thisen chhuah theihna dinhmunah a ding mek nia hriat a nih avangin fimkhur taka hmalak a thain an hria tih a sawi a ni.
Hetihlai hian, foreigner leh smuggling tih lam chu an thutlukna siamna chhan a nilo tih sawiin thisen chhuahna a thlen an hlauh vang a nih ber thu Pu T Sangkunga chuan a sawi a, helai boruak hi tuamdam a nih hma chuan vehbur hi khawn rih lo ni se an ti mai tih sawiin, Saikhumphai laka Vaiphai chet dan chungchangah leh Ukil vau thu-ah Vaphai lam chuan insawithiamna an neih ve tho thu leh ukil vau hun lai khan Vaphai hruaitu zingah Aizawl thleng hman an awm loh thu an sawi ve tih a sawi a, Saikhumphai bawk Court hâla an puhna resolution pawh an siam a nih loh thu leh Saikhumphai bawk hâl zan khan an hâl tel loh zanlaia inkang leh te a awm niin an sawi ve bawk tih a sawi a ni.
He inkawmna ah hian MJA lam pawhin Central YMA chu thu lai tak laa nu leh pa chan changa hma la tura an duh thu leh thuthar lakhawmtute pawhin thleihtawpa fimkhura he thil chungchangah hian thuziah \ha an tih thu an sawi a ni.
Hetihlai hian nimin khan Mizo Zirlai Pawl leh Mizo Students’ Union \angrual chuan thuchhuah in\awm an siamah vehbur an khawn avang hian Saikhumphai dinthar leh nise an duh tihna a ni lo tih sawiin, he khua din leh din loh chungchangah thuneitu pawh an ni lo tih chiang taka an hriat thu an sawi a. Thil kal tawh, siamthat theih loh lam ngaihtuah loh nise tiin Saikhumphai bawk hâl a nih a\anga vawiin thlenga sawr-karin tanpuina a pek thawm hriat tur a awm loh avang te, an zirlai pui, naupang te te in mutna leh ei tur nei lova, ruahsur leh khawvawt kara an awm tur hi an ngaihtuah ringawt pawhin lungchhiat-thlak an tih thu an sawi a. Mizo puiten harsatna an tawh laia, \anpuina hmasa enge-mawzat tal lo pek theih \haa an hriat avanga che chhuak mai an ni tih min hriatsak turin Mizo an ngen tih an sawi a, Zirlai Pawl pahnihte chuan he thil thleng rapthlak tak hian nghawng chhe zawk a neih loh nan sawrkarin a rang thei angin hmala tawhse an duh thu leh Mizo leh Mizo kara boruak tha lo dang a chhuah zel loh nan kohhran mipui zawng zawng pawh tawngtaia Pathian au turin an sawm tih an sawi.
Mizoram News