Kum 2008-a Lumpsum Grant-in-Aid-a hlânkai school 78-te chuan ngaihsak an hlawh loh avangin khaw tam takah chuan zirna kalpui chhunzawm theih a ni dawn lo tih Mizoram Government (Lumpsum) Aided School Association (MIGASA) chuan a sawi.
Hemi chungchanga nimina an thuchhuahah, MIGASA chuan an dinhmun siamthaa Adhoc Aided-a hlângkai tûrin tun sawrkar hi vawi engemawzat an lo ngen tawh tih sawiin, an ngenna in awmzia a neihloh mai bakah, an chungchang chu rorelna inah leh thuneitute ṭhutkhawmah pawh sawilan a ni ngai lo tih an sawi a, khawtlâng malin thawktu zawng zawngte mamawh phuhru tûr thla tin sum thawhkhawm chu thil theih a nih loh avangin, kum 10 leh a aia tam harsatna tam tak pal tlanga an lo thawhna te, zirna atâna ngaihtuahna an lo sên tawh na te, an enkawl mêk naupang ngaihtuahna te vangin rilru na hle mahse sawrkarin an dinhmun a ngaihtuah sak si loh avangin zirna a tâwp ngei a ngai dawn ta tih an sawi a ni.