2011 chhiarpui-ah Mizoramah mihring 10,97,206 an awm

Kum 2011 Chhiarpui (Final Population Data Sheet)-a Mizoram chungchang bik tarlanna “Primary Census Abstract – Mizoram” tih chu nimin chawhnu dar 1:30 khan MJA president Pu C.Lalrambuatsaiha’n Aizawl Press Club-ah a tlangzarh a, heta a lan dan chuan, Mizorama mihring cheng zat chu 10,97,206 an ni.

Nimin khan Aizawl Press Club-a thutharlakhawmtute hmaa Final Population Data Sheet hi Mizoram Journalist Association President Pu Lalrambuatsaihan a tlangzarha, Mizorama mihring cheng zat chu Provisional Figure chhuak tawh aiin mi 6,192 in a pung a, Chhiarpui a taka tihchian a nih hnuah hian Mizorama mipa awm zat chu 5,55,339 niin, hmeichhe zat chu 5,40,867 a ni a, chhiarpui hmasa aia mihring punna hi za zela 23.48 niin, mipa 1000 zelah hmeichhia 976 an awm a ni.

Mizoram ah kilometre khat bialah mi 52 zel an cheng a, mihring chen bitna ber Aizawlah KM khat bialah mi 112 awmin, an tlemna ber Mamit-ah mi 29 zel cheng ang a ni a, Mizorama ziak leh chhiar thiam zat chu za zela 91.33 niin, ziak leh chhiar thiam tamna ber Serchhip ah za zela 97. 91 awmin, a tlemna ber Lawngtlaiah za zela 65.88 ani.

Tun hmaa Mizoram zau zawng Sq KM 21,081 tih thin chu kum 1981 chhiarpuia Square KM 21,087 ti a, km 6 bial hloh anga chhut a nih hnuah,

Tun chhiarpui 2011-a Mizoram-a chhungkaw cheng zat chu 2,22,853 ani a, state chhunga cheng mihring zingah Sheduled Tribe mi 10,36,115 an awm a, Scheduled caste mi 1,218 an awm bawk.

Nimina Final Population Data Sheet tlangzarhna hun hi Pu Lalhmingthlanga Dy.Director Census Operations, Mizoramin kaihruaiin, Pu Lalhmingthanga chuan Final Population Data Sheet chu a bu anga siam beisei an awm theih laiin, State district 10 nei chin tan chauh a bu-a siam phal a nih avangin a pheka siam a ni tih a sawi a, hetah hian Census Operations, Mizoram Statistical Investigator Pu Lalbuanga Sailo chuan lawmthu a sawi rualin chhiarpui thar bera Mizoram mipui punna za zela 23.48 chu India ram huap za a 17.7 aia a san thu leh India pum ziak leh chhiar thiam za a 73 a nih laia Mizoram zaa 91.33 ani tih a sawi a, Hmarchhak state zingah Mizoram chu thingtlang aṭanga khawpuia pem lut an tamna ber nia a lan thu a sawi bawk a ni.