Mizoram Education Mission Society (MEMS) Governing Body Meeting vawi 8-na nimin khan Chief Minister’s Office Conference Room-ah MEMS President Pu Lal Thanhawla, Chief Minister kaihhruaiin neih a ni.
Chief Minister chuan an sawrkar tirh aṭanga Mizoramah Education siamṭhat an duh avangin India rama a pahnihna ni turin Education Reforms Commission din a nih thu sawiin, a report thehluhte pawh hman dan tur leh hman theih dan ngaihtuah mek a ni, a ti a. Zirlai naupangin zirna ṭha an dawnna turin zirtirtu chu trained chhuak ngei an nih a ngai a ni, a ti.
Governing Body meeting-ah hian meeting neih hnuhnung bera an thurel bawhzui a nih dante sawiho a ni a, kum 2010 – 2013 chhunga SSA leh RMSA hmasawnna te leh a hlawhtlinna te leh kum 2013 – 2014 chhunga an hmalak tur chhawpchhuahte an sawiho a ni.
Meeting-ah hian SSA din tirh kum 2001 aṭanga 2013 – 2014 thlenga sum hmuh tawh chu cheng nuai 78519.60 a ni tih tarlan a ni a; Primary leh Upper Primary School building thar 561 sak tawhte, Block Resource Centre 26 leh Cluster Resource Centre 171, hmeichhe hostel 9 leh residential hostel 2 sak zawh tawh a nih thute tarlan a nih bakah hmasawnna ruhrel infrastructure hrang hrang ṭhahnemtak siam a nih thu leh hnathawktu hrang hrang mi 4658 an awm thute tarlan a ni. RMSA din tirh kum 2009 aṭanga kum 2013 – 2014 thlenga sum hmuh tawh pawh cheng nuai 15866. 25 a nih thu tarlan a ni bawk a. Secondary school thar 81 kal lai mek awm bawkin, hnathawktu hrang hrang mi 920 an awm mek thu tarlan a ni bawk.