Uttarakhand a ruahsur nasa vang a tuilian tuar te chhanchhuah leh chhawmdawl beihpui thlak chhunzawm zel a ni a. Tun thleng a tuilian danchah mipui thiarchhuah tawh zat chu 34000 tling tawhin, midang 49000 aia tam tuilian danchah an la awm a ni.
Tuilian leh a kaihhnawih thil thleng a thi hriat chian tawh zat chu 207 an tling tawh a. State sawrkar chuan thi te hi ni 3 chhung sun anih tur thu a puang a ni. Tuilian tawrh nasat zualna Rudraprayag dist a Kedar Valley bialah chuan sipai, Indian Air Force leh ITBP te’n pilgrim leh tourist tangkhangte chhanchhuah beihpui an thlak ngawrh zual a, helicopter te hmangin heng mi te hi thiar chhuah an ni.
Madhya Pradesh sorkar pawhin Uttarakhand tuilian tuarte chhanchhuah hna thawhna a piuh nan helicopter 3 a thawn a, Punjab, Chhatisgarh leh Uttar Pradesh sawrkar te pawhin helicopter an thawn bawk.
Prime Minister Manmohan Singh-a chuan Uttarakhand tuilian tuar te tawrhpui turin khua leh tui zawng zawng te a ngen a. Ngenna siamin Dr Singh-a chuan Prime Minister’s Relief Fund a phal tak a pawisa thawh turin a ngen a ni.
Congress President Sonia Gandhi chuan Congress MP te leh MLA te chu an thla 1 hlawh Uttarakhand tuilian tuar te chhawmdawlna a pe turin a hriattir a. Congress MP te chu MP Local Area Development Fund atanga cheng nuai 10 ṭheuh pe turin a hriattir bawk.
Hetihlai hian sawrkar laipui chuan State Disaster Relief Fund aṭangin cheng vbch 145 Uttarakhand sawrkar a pe a, Prime Minister duhdan ang a hei hi tih a ni tih I&B Minister Manish Tiwari-a’n Group of Minister’s Meeting neih zawh ah a sawi ani.