Mizoram News

Engineer-ten Secretary Post an ngenna thil theih a ni lo tih sawi

Mizoram All India Services Association chuan Mizoram Engineering Service Association MESA-in Department 3- PWD, P&E leh PHE-a Secretary post an tana hauh tura sawrkar-a an ngenna chu thil tih theih a ni lo tih an sawi a, hemi chungchang hi Chief Minister hnenah nimin khan an thlen nghal a ni.

An sawi dan chuan sawrkar inrelbawl danah Secretary chu department leh Minister inkara thu laila taka awm tur a nih laia, Engineer-in Secretary post a ṭhut chuan thil felhlel awm thei hrang hrang a ven theih dawn loh a ni. Heng department te hi, hnathawktu tam tak nei leh sum tamtak lalut thei an nih avang pawhin an hnathawh kalhmang a dang a, technical lam mithiam Engineer bawkin a ṭhutchilh chu thil tih chi a nih loh mai bakah, administrative officer ngeiin a ṭhutchilh a pawimawh a ni an ti bawk.

Hei bakah hian, MESA thil ngiat hian All India Service te a nêk chêp hle dawn tih an sawi bawk a, hetiang thil chungchang hi sawrkar laipui râwn lova chinfel mai chi-ah an ngai lo tih an sawi.

Tarlan tawh angin, MESA chuan an puala Secretary post leh anmahni hamṭhatna pe tura sawrkar nawr nan tunah hian badge dum belin an lung-awilohna an lantir mek a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram