Zirtirtu lâk tum leh TET exam tum ṭhulh

Mizoram sawrkarin Zirtirtu a nghet a thawk Voluntary Retirement Scheme aṭanga chhuak te hmun âwl hnawhkhahna tur Post 169 vawi-ina lâk a tum chu ṭhulh rih a ni a, Inrinni-a SSA zirtirtute tana TET exam buatsaih a tum pawh a ṭhulh rih bawk.

Hemi chungchanga thulakna tarlan danin, VRS post ruak hnawhkhahna leh TET exam hun tur hi tun dinhmunah tihchian a la ni lo a, exam tur thil chi hnih-ah hian siamrem ngai a awm avanga ṭhulh lailawk a ni.

Hetihlai hian, Mizo Students Union (MSU) chuan nimin khan VRS hmun âwl hnawhkhahna tur Post 169 sawrkarin lak a tum chu Dan leh hrai palzûtna a ni an ti a, Aizawla an Office a thuthar lakhawm tute kâwmin MSU President Zodinpuia chuan vawiin thlenga palzut theihloh Dan dinglai ah TET paltlanglo te zirtirtu atan lak phal a nih loh avangin, he thil hi kaltlangpui chi a an ngaih loh thu a sawi a.

A sawi dan chuan, pawl 1 aṭanga pawl 4 zirtirtu atan Senior Secondary emaw a tlukpui za zela mark 50 aia hmu tlem lo leh kum 2 Diploma in Elementary Education emaw nei tur a ni tih a ni a, hemi bakah hian Teacher Eligibility Test (TET), NCTE kaihruaina hnuaia exam a pass ngei tur a ni tih a ni bawk a, pawl VI-VIII inkar zirtirtu atan Graduate leh 2 year Diploma in Elementary Education passed tawh Teacher Eligibility Test (TET), NCTE kaihruaina hnuaia exam a pass ngei te lak tur an ni bawk a, Reservation Policy hmanlai angin ST/SC/OBC/PH tan za a 5 ngaihna thiamna pek a ni. Hemi vang hian Sawrkar pawhin zirtirtu lak a tumnaah pawh TET neih hmaa zirtirtu lak kaltlangpui tum a nih chuan MSU chuan a dodal nghal ang tih a sawi.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram