Mizoram News

Lunglei District hmasawnna hmuh tur ṭhahnem tak awm ti

UD & PA Minister Pu Zodintluanga’n Lunglei District hmasawnna turin sawrkar chuan ruahmanna hrang hrang a siam a, kum 4 leh a chanve  chhungin, hmasawnna hmuh tur ṭhahnem tak a awm tawh bawk a ni a ti.

Nimina Lunglei Circuit House Conference Hall a tualchhung thuthar thehdarhtute a kawmnaah he thu hi sawiin, Minister chuan, Sazaikawn ah vaibelchhe 6 sengin multi purpose Indoor Hall sak tum a ni a ti a, mirethei in leh lo neilote tan chhungkua 500 tan in sak sak an nih tawh bakah UD&PA Deptt. hnuai ah  retaining wall leh step siam nan vaibelchhe 8 vel sen a ni a ti bawk. Lunglei District tana recreation centre Theiriat a sak tur pawh kalpui mek a nih thu sawiin HPC Fund cheng vaibelchhe 7 sawrkar in an dah ani a ti bawk.

Sports changtu ni bawk, Pu Zodintluanga chuan,  Serkawn ah Stadium puitling sak nan ram neih a ni tawh a, a sak nan hian cheng vaibelchhe 20 central ah DPR thehluh a ni a, Catch them young leh 2016 vision pawh chak taka kalpui mek a ni a, thingtlangmi talent nei tha te zawn chhuah mek an ni a ti.

He hunah hian Parliamentary Secretary Pu S Laldingliana pawhin thusawiin, hriselna lamah Mizoram sawrkarin hma chaktakin ala mek a, Aizawl Referal Hospital khum 500 awm theihna tur leh Cancer Hospital khum 100 awm theihna tur DPR peihfel a ni tawh a. Mizo nula leh tlangval ten mahni ram ngei a an zirve theih nan medical collage DPR peihfel ani tawh a ti bawk.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram