Mizorama vawk hri leng New Delhi-ah sawiho dawn

Mizoramah vawk natna hlauhawm tak Porcine Reproductive and Respiratory Syndrome (PRRS) a awm tih finfiah nawn a nih tak avangin hemi chungchanga hmalak dan tur ngaihtuah leh duang tur hian Thawhlehni hian New Delhi-ah Expert Committee an ṭhukhawm dawn.

AH and Vety Director Dr. LB Sailo sawi danin PRRS natna hi Mizoramah a awm tih tun Zirtawpni-a High Security Animal Disease Laboratory, Bhopal-a mithiamte’n an finfiah tak thu a sawi a. Mizoram district 6-a kumin March leh April thla chhunga vawk hri leng zinga pakhat chu PRRS a nih tih finfiah nawn a nih leh tak avangin sawrkar laipui lamin an rawn ngaihven ta hle niin a sawi a. Thawhlehni-a an inrawnkhawmnaah hian hmar chhak State-a AH & Vety Department Secretary leh Director zawng zawng koh vek an ni a. Mizoram aṭang pawhin AH & Vety Secretary leh Director leh Laboratory a thawk department Officer 2 te an tel ve dawn a ni. India ram Laboratory changkanga Scientists leh Scientists dang engemawzat koh an ni bawk.

Dr LB Sailo chuan tunhma lamah USA-ah an hmu tih mai lo chu he vawk natna PRRS hian hmun dangah thawm a nei lo hle a. Mizoram ṭhenawm Myanmar ram erawh chu a chenchilh tih hriat a ni thung.

Vety Director chuan Mizoramah pawh he natna hlauhawm tak hi tunhma zawng chuan a lo la thleng ngai lo niin a sawi a. Kumin March ni 18 khan Aizawl Ramthar venga Pu Thanliana vawk chu he natna avang hian a thi tih dawn a ni phawt a. A hnu zelah Mizoram District 6 ah a leng ta chum chum mai niin a sawi.

A tirah chuan kum danga leng ṭhin vawk hri tlanglawn Classical Swine fever an tih hi ni mai turah ngaih a nih laiin a thawh dan enin natna hlauhawm zawk PRRS a ni ang tih doctor ten an ringhlel a. Classical Swine Fever a lêng tih finfiah a nih hnuah pawh PRRS a tel palh thei ang tih ringin Serum Sample te chu Laboratory changkang zawkah thawn zui a ni a. Borapani khuaa ICAR Laboratory-in PRRS a ni tih an hmuhchhuah chu Bhopal khawpuia High Security Animal Disease Laboratory mithiamte’n Zirtawpni khan an nemnghet leh ta a ni. Kum 1980 chho vel khan he natna hi US ah hmuh a ni a, tunah chuan Myanmar-ah chiah a awm nia hriat a ni. He natna laka invênna damdawi Vaccine siam theih a nih loh avangin he natna lak atanga inven ngaihna a awm lo a, amaherawhchu thla hnih thum kaltaa Mizorama a lên khan Swine fever emaw tiin Antibiotics-in chiu an ni a, vanneihthlak takin alo ṭangkaiin awmzia alo nei hlauh a, he natna vei za zela 50 aia tam chu an dam leh phah niin Dr LB Sailo chuan a sawi.

Amaherawhchu he natna vei dam leh tak hi an hlauhawm theih dan a awm a, a virus hi a pai reng tawh a, chuvangin he natna ûmbo tur chuan he natna vei tawh dam leh te chu suat vek an ngai tihna a ni a, chumi tur chuan sawrkarin engtiangin nge hma a lak dawn a hriat loh a ni.

PRRS natna hri hi Myanmar aṭanga lo lut tih a chian avangin August thla thleng Myanmar aṭanga vawk lakluh khapna tihchhuah tum nghal a ni a. Mizorama PRRS hmuh a nih tak avang hian khawvel map a PRRS awmna Myanmar chauha chhin chhiah ṭhin chu India ram a rawn lang tel dawn ta a, India ram Scientist tamna ram tan chuan a zahthlak hle niin AH & Vety Director chuan a sawi.

Zirtawpni khan AH&Vety Directorate chuan hmun hrang hranga Vety Doctor leh thawktute chu vawk PRRS natna vei dam lehte chhinchhiah vek turin a ti a, hei hi he natna vei tawh suat (culling) a ṭul tak thulh atan tih a ni a. Tun hnaia vawk hri lengah khan vawk 3800 vel zet an thi hman a, May thla chawhnu lam aṭang kha chuan he natna avanga thi report a awm ta rihlo a ni.

Vety mithiamte chuan he natna hi mihring leh ran inkaichhawn theih chi (zoonatic desease) a ni lo a, mihring ei atan a ṭha e tihna lam nilovin ei atan a hlauhawmna a awm chuang lo niin an sawi.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram