Pre-Service Teachers Association (PRESTA) chuan nimin khan Voluntary Retirement Scheme VRS hnuaia hnaruak hnawhkhat tura exam ngiatin Chief Minister Pu Lal Thanhawla Thenzawl kal tur an dang a, hun engemaw chen Police te nen an innawr a, hetah hian zirlai 2 leh Police 1 ten hliam na vak lo an tuara, hemi hnu hian an ṭin darh a ni.
Thulakna tarlan danin, hliam tur zingah hian zirlai mipa 1 leh hmeichhia pakhat an tel a, hmeichhia hi an innawrna ah tlu in pungkhawmin an chil a, Police pakhat hliam tawk pawh a ngaihtuah awm loh a ni.
Hemi hnu hian, an lungawilohna chungchang chu Aizawl-a thuthar thehdarhtute hrilhin PRESTA hruaitute chuan sawrkarin VRS post ruak hnawhkhah turah nimina written exam ziak tura a tih tawh chawpchilh taka a ṭhulh leh ta chu hriatthiam har an tih thu leh a chhan hriat an duh thu an sawi a, TET nei ngei ngei tura tih zingah anni, tuna kum 2010-a post ruak hnawhkhah tum te chu an tel loh avangin VRS exam hi a rang thei ang bera buatsaih leh ngei turin sawrkar an phut tih a sawi.
He thilah hian Mizo Students Union an inrawlh tih sawiin, PRESTA hotute chuan MSU ten exam theilo tura hma an la chu a lungchhiat thlak hle a ni an ti a, he thilah hian tute emaw hiattu an awm nia an hriat thu leh tun achinah kum 2010 hnu lama SSA zirtirtua lutte TET exam tur pawh an dodal dawn tih an sawi a ni.
PRESTA President Pu C.Vanlalruata sawi danin, tun tuma exam ziak tur hian Mizoram hmun hrang hrang aṭangin mi 800 chuang an kalkhawm a, nimina Police te nen an innawrnaah, hmeichhe police tel lovin an thawhpui hmeichhia te pawng nawr an ni chu an lungawilo hle tih a sawi bawk.
Hetihlai hian nimina PRESTA lungawi-lohna lantir dan chu en liam mai mai theih a ni lo tih Aizawl District Deputy Commissioner leh District Magistrate chuan nimina thil thleng a sawifiahnaah a sawi a, tun hnuah pawh buaina siam zawnga lungawilohna lantirtute chungah Dan leh Thupek kengkawhtu ten a ṭul dan ang zelin an hna an thawk ang, a ti a ni.
DC chuan, lungawilo te hian chawpchilh takin Chief Minister hmuh an duh tih a sawi a. Chief Minister hi programme neia zin chhuak ṭep a nih avangin hmuh a rem lova, midangte tihdanin an hriat duh te hnutchhiah mai ṭhaa a lan laiin Chief Minister zin chhuak tur chu a Bungalow gate thlangah an lo dang a, hetah hian dan leh thupek kengkawh tute nen an innawr ta a ni.
Chief Minister a zin chhuah hnuah, heng mite hi an la pun khawm zel avangin Magistrate leh Addl. S.P.-te ruahmanna in PRESTA hruaitute leh School Education Director inbiakna neih a ni a, hetah hian exam tur hi ṭhulh loh theih loh a nih dan leh thil awmdan chiang taka hrilhfiah an ni, a ti.
Heng exam beih tum ten an lungawi lohna an lan tir hi chu a awm viau laiin Chief Minister, Head of the State meuh zin tur dang (restrain) zawnga hma an la hi chu a awm lovin dan kalh a nih avangin hnawh kian loh theih loh an ni tih sawiin, buaina siam zawnga lungawi lohna lantir hi chu District Administration tana en liam mai mai theih a ni lo a ni. Tun hnuah pawh buaina siam zawnga lungawilohna lantir tute chungah Dan leh Thupek kengkawhtu ten a ṭul dan ang zelin an hna an thawk ang, tiin a sawi.