Seal lem hmanga sum la chhuakah MLA puh

MNF Party chuan Congress MLA Pu RL Pianmawia chu seal lem hmanga VC pakhat hnathawhna tur sum lachhuakah a puh a, a chet dan chu dan bawhchhiatna dik tak a ni an ti.

Hemi chungchangah hian nimin khan MNF Gen HQ Publicity Board chuan MNF Office-ah thuthar lakhawmtute kawmin, an Vice Chairman Pu Lianzuala chuan kumin April ni 16 khan, North Serzawl VCP Pu Thinlaihnema leh Vice President Pu Lalthanglura Sailo-te chuan, North Serzawl VC hmingin DC Office-ah Work Order a awm tih thawm hria-in an chhui chiang a, an beisei loh takin an hminga sum awm, cheng nuai 1 chu VCP Seal lem leh signature lem hmangin lak chhuah tawh a ni tih an hmu ta a, a tukah Aizawl Police Station-ah, hemi chungchang chhui chiang tura ngenna FIR an thehlut a, DLAO hnenah pawh Complaint an thehlut bawk a ni.

FIR an thehluh tuk, ni 18 ah chuan bialtu MLA Pu RL Pianmawia chuan North Serzawl VCP leh Vice President chu a office-ah lêngah sawmin, seal lem hmanga pawisa lachhuaktu chu amah a nih thu a hrilh bakah Seal lem a kawl lai pawh a hmuh a, ngaihdam a dil a, an inngaidam a ni. Hemi hnu hian seal pawh chu hetihlaia awm ve DC Office-a Officer pahnih hmuh laiin hâl ral a ni tih an sawi.

North Serzawl VC-te hian MLA ngenna angin FIR an thehluh chu an hnuk kir a, amaherawhchu hemi hnu hian MLA aṭanga beih an tawk a, khawtlang tana thil tih tur hrang hrangah diklo taka che-ah puh an nih hnuah tunah hian VC ṭhiah ngai hialah MLA chuan a chhuah ta niin a sawi.

He thil thleng chungchangah hian MNF chuan Pu RL Pianmawia chu rinawmna thu a tiam tawh bawhchhia a puhin Police lam pawhin FIR lût tawh Criminal case chiang tak hnuhkir leh an lo remti mai chu an kut phuar a nih zia tilangtu a ni an ti a, MLA in hetianga thutiam a bawhchhia hi Speaker-in engtinnge a tih dawn tih chu an thlir mek thu sawiin, hetihrual hian HPC demand Area VC ṭhenkhat inthlan neih tak loh thla 18 hnua inthlan puan a ni chauh chu zahthlak an tih thu a sawi bawk.

He inkawmhona hi an Gen HQ Publicity Board Chairman Pu Lalsawmliana Pachuau-in a kaihhruai a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram