Zothlifim Logo
Loading ...

District Level Committee on Green Mizoram, Serchhip hmalaknain nimin chawhma dar 10 khan Serchhip DC Conference Hall-ah Green Mizoram Day 2013 pual a inkhawm a ni a, chawhnu lamah Serchhip khawpui leh a chhehvel hmun hrang hrangah thingphun hnatlang neih nghal a ni bawk.

Green Mizoram Day puala chawhmaa inkhawm neih hi District Bawrhsap, District Level Committee on Green Mizoram, Serchhip Chairman ni bawk Pi Juhi Mukherjee, IAS chuan khuallian niin a hmanpui a, PCR High School zirlaite leh zirtirtute bakah tlawmngai pawl hrang hrang te, sawrkar hnathawk te an tel ṭha hle a ni.

He inkhawmah hian khuallian District Bawrhsap chuan thusawiin, Mizoram hi Tropical Evergreen Forest hnuaia awm a nih avangin ramngaw te a ṭha duh em em a, mahse mihring khawsak phung changkang zelin heng ramngaw ṭha tak tak te hi a tih chereu mek zel avangin, ruahmanna thar nen hun lo la kal tur thlir a, theihtawp chhuaha ramngaw chhe mek venhim chu kan tih tur makmawh a ni a ti a, Thingkung te hian kan mamawh chi hrang hrang Oxygen, chenna In, silhfen leh eitur chi hrang hrangte min hlui avangin kan zah thiamin kan duat thiam a pawimawh ani a ti bawk.

Nimin inkhawmah hian kum 2012 Green Mizoram Day denchhena thingphun Sawrkar Department hrang hrang zinga thing phun nung ṭhate hnenah lawmman sem a ni a, District Bawhsap in lawmman te hi a hlan a ni. Heta lawmma dawng tu te chu : Pakhatna- Public Works Department ; Pahnihna – Marian High School, Serchhip ; Pathumna – Police Department leh 14 Assam Rifles te an ni.

Kum 2013 Green Mizoram Day thupui atan hian “Thing phun la, i ram chhan rawh (Plant Trees – Save Your Land)” tih chu hman a ni a, hemi denchhen hian chawhnu lamah khawpui chhung leh pawn hmun hmun hrang hrang thlanchhuah bikah te thingphun hnatlang neih a ni a, District Bawrhsap hovin  Sawrkar Department hrang hrang a thawk te, Sub-Headquarters YMA Serchhip leh School naupang ten thingphun hnatlang hi an nei a, heng thingphun tur tiak leh a hungna tur pal te hi Divisional Forest Officer, Thenzawl leh a thawhpui ten a thlawnin an sem a ni.