Tuikuk raltlan lak let leh tumna kal mekah Mizoram sawrkar aiawhte chu Tripura lamah kal thuai an tum.
Home department-a Joint Secretary Pu Lalbiakzama sawi danin Tripura sawrkar chuan tunhnaiah khan ramri lam boruak a ṭha tawh nia sawiin Tripura-a raltlante dahna (relief camp) a tlawh theih tawh niin an rawn sawi a. Mizoram sawrkar aiawhte chu Tripura relief camp te tlawh turin an rawn sawm a. Rem chan lohna dang a awm loha Mizoram sawrkar thuneitute’n an remtih chuan tunkar tawplamah hian Mizoram sawrkar official-te chu Pu Lalbiakzama ho hian Tripura-ah an kal ang a. Tripura sawrkar official-te nen Relief camp te hi tlawhin Mizorama kir turin an sawm dawn a ni.
Tarlan tawh ṭhin angin thla hlui tawp lam khan Tuikuk raltlante laklet chhunzawm tum a ni a, mahse, ruahmanna siam mek a nih laiin Mizoram leh Tripura inrina bawr vela boruak a ṭha tawk lo nia hria-in Tripura sawrkar lamin Mizoram sawrkar official-te hi raltlan dahna khuate tlawh rih lo turin an rawn a. Chuvang chuan tun thleng hian Tuikuk raltlan laklet lehna atana ruahmanna chu sawn hlat a ni ta rih a ni.