Central YMA chuan General Conference-a an thu lo Pawm tawh Faina beihpui Thlak tih chu kalpui ṭan turin Inrinni zing khan Central YMA Hall Tuikhuahtlang-ah a hawnna Inkhawm an buatsaih.
Faina Beihpui Thlak Programe hi Central YMA President Pu T.Sangkunga chuan a hawng a, hemi rual hian Faina Beihpui Thlak nana thawk chhuak hmasa tur Central YMA Faina Campaign-na tur Motor a vailiam nghal a ni.
Pu Sangkunga chuan Mizote zingah Faina chungchang in zirtir a la ngai nasa hle tih sawiin keimahni mai nilo kan khawlai leh kan chhehvel a bawlhhlawh leh Fai hian kan hnam nunphung leh kan changkanna a pholang a ni a ti.
Central YMA President chuan hemi tihhlawhtling tur pawh hian YMA Branch hrang hrangte chuan,theihtawp chhuahin hma an lo la tawh ṭhin a, mahse mipui lamin an zawmpui ṭhat tawkloh avangin awmzia tak tak a nei theih meuh lo a. Hemi avang hian Central YMA chuan Khawmpui lian hialah chhawp chhuakin Faina beihpui thlak tih chu hmalak chhunzawm turin a pawm ta a ni a ti.
Faina Beihpui Thlak Committee Chairman Central YMA General Secretary Pu Vanlalruata chuan hawnna Inkhawm hi kaihruaiin Central YMA chuan tuna a thupui thlan chhuah tak Faina beihpui thlak tih chu a hlawhtlin ngei theihna’n theihtawp an chhuah dawn tih sawiin, Branch YMA tinah pawh hemi lama tha thawh thar leh turin ngenna an siam dawn tih a sawi a. Sawrkar lam pawh hemi kawngah hian thawhpui dan tur zawnpui an tum thu te, hemi atana Awearness Campaign pawh uar zawka kalpui a ṭhat tur thu te a sawi bawk.