Mizoram News

Chief Minister-in Hmuifang Park leh School hawng

Inrinni khan Hmuifang Tlanga Lallianvunga hmuna LAD-in Hmuifang Park an sak chu Mizoram Chief Minister Pu Lal Thanhawla’n a hawng a, Rest House leh Cabin chu LAD Minister Pu PC Lalthanliana’n a hawng nghal bawk.

Bigha 58.95-a zau Hmuifang Park hi Rs.1,58,83,000/- senga sak a ni a, Hawnna Inkhawm neih Chief Minister Pu Lal Thanhawla chuan hlawkna beiseia avanga rel kawng chhimlam kawtchhuah thlenga siam tum leh Tuirial Hydel Project leh hmun dang-ah duhawmna avanga harsatna tawh mek a nih laia miṭha leh thilphal, sum beisei lova mipuite tana ram a thlawnna pe an awm ṭhin chu lawmawm a tih thu a sawi a. Helai hmun hi Thenzawl leh Sialsuk nen inthlun zawmin Tourist Circuit lian tham tak ruahman a nih thu Chief Minister hian a sawi a ni.

Hmuifang Park-ah hian Rest House leh Cabin bakah Tree House leh Intihhlimna chi hrang hrang tam tham tak siam a ni a. Park hi kar khata Ni 7 hawn tur niin, puitling tan Rs.10/- leh naupang tan Rs.5/- luh man siam a ni a. Outdoor Camping duh tan Rs.500/- a ni a, Rest house-a Cabin hman man hi chhun lamah Rs.200/- luah man a ni a, zan lama luah duh tan Rs.500/- a ni thung.

Hemi hma Inrinni zing khan Pu Lal Thanhawla hian Thenzawl Vengthar-ah SSA hnuaia hmalaknain Upper Primary School (Middle School) Rs.28,86,000/- senga sak a hawng bawk.

School hawn tak hi nikum October ni 4 khan bul ṭanin kumin June ni 15 khan zawh fel a ni a, classroom 4 awmin zirlai naupang mipa leh hmeichhia ten a hranga an hman turin inthiarna siam a ni bawk a, rualbanlote tan siam sak a ni bawk. Tunah hian zirlai naupang 36 an awm mek a, zirtirtu subject thlan bik zirtir thei specific teacher 3 leh Hindi leh zirtirtu pangngai 2 an awm mek bawk a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram