Labour and Employment Minister Pu Lalrinliana Sailo chuan, “Hnamdang kuthnathawk ten thla tin cheng vaibelchhe 10 chuang Mizoram sum an pawt chhuak ziah ṭhin a, a tam thei ang ber pawh tan tum a ni,” a ti.
He thu hi nimin khan Aizawl ITI-a Building and Other Construction Welfare Board hnuaia Kuthnatawktute tana kar khat awh Tile chi hrang hrang phah zirtirna tur a hawnnaah a sawi a, Minister chuan, “Survey aṭanga a lan danin Mizoram aṭangin thla tin hnam dang kut hnathawk te chuan cheng vaibelchhe 10 chuang state sum an pawt chhuak ṭhin a, a chanve chauh pawh pawt tâng ila state ei leh bâr dinhmun siam ṭha khawp a nih avangin, hnam damna turin kuthnathawktute chawikan a ngai a ni,” a ti a. Labour Minister chuan kuthnathawh hnam dang kuta dah ringawt zel chu a dik lo takzet tih a sawi a, hnam dang te chuan state sum an pawt chhuak mai ni lovin, ILP a an hna thawh tur mil lovin duh ang angin thawkin, Mistiri lo pawhin mistiri inti chawpa Mizote chu rûn mek kan ni a, hetiang dinhmuna kan awm avang hian ṭhalai tam tak hna thawklo te chu khaichhuah an ṭul a ni a ti. Hemi chungchangah hian hnamdang hnathawk te chu an thiamna mila chhinchhiah tura hmalak mek a nih thu leh ṭhalaite pawh darkara an inhlawh theihna tur kalpui mek a ni a ti bawk.
Pu Lalrinliana Sailo chuan department leh Company hrang hrang labour Welfare Cess la pe lo te chu rûn mek an nih thu leh he thil hi Supreme Court thuchhuak a nih avangin a pe lo te chu dim an ni dawn lo tih a sawi a, Chief Secretary kaltlangin a pe lo te chu koh an ni dawn tih a sawi bawk a, Kuthnathawk training zo te hi Tile Cut-na khawl Rs.3,000/- man ṭheuh pek an ni dawn tih a sawi bawk.
Kuthnathawktute tana Tile phah zirtirna puala inkhawm hi Labour Commissioner Rotluanga’n kaihruaiin, hnamdang inhlawh ten tile phah ah ni khatah Rs.6,000 – 7,000 lai an hlawh mek a, chuvangin he zirna hi taima taka zir chhuak tur leh a thiam lo te chu kar 2 thleng pawh zirtir an nih tur thu a sawi a, Mizo te ṭhanmawh bawk kum 3 labour nih hnua Mistiri nih tum reng reng lo chu kalsan ṭha a tih thu leh hnamdang tih anga a neitu ten a ṭhalo an tih ṭhiat mai lova, thuneitu emaw intih chin ve mai ṭhin chu sim atana thil ṭha tak anih thu a sawi bawk a ni.
Training thawhkhatnaah hian mi 49 zirtirna pek an ni ang a, hemi hnu hian inziahluhna hun siam lehin zirtirna pek chhunzawm leh a ni ang.