Grade Pay Rs.4200 chin hna lâk MPSC kuta hlan remti

Chief Minister Pu Lal Thanhawla hova Council of Minister ṭhutkhawm nimina Aizawl-a neih chuan, Grade Pay `4200/- chin hnalak theihna Mizoram Public Service Commission kutah pek ni se a ti.

Nimina minister te meetingah hian sawrkar hnathawk hlawh Pay Band 2 a Grade Pay `4400 MPSC hnena hlan let leh chungchang pawh sawihoin, Council of Ministers Meeting chuan ni 29 December 2011 a an lo ngaihtuah tawh chu ennawn lehin Pay Band 2 Grade Pay `4200 leh a chunglam chu MPSC kuta hlan leh a remti a ni.

Hei bakah hian HPC(D) te nena inbiakna chu Secretary Level ah neih ni tawh se an ti a, hei bakah hian Mizoram Civil Service te tana Combined Competitive Exam Regulation siam-ṭhat rawtna a pawm bawk a, hemi hnuaiah hian MPS physical test neih tawh loh ni se an ti a ni.

Hemi hma hian Mizo Students’ Union (MSU) chuan hnalak chungchanga sawrkarin MPSC thuneihna a lak sak pekir tura nawrin, Kum 2011-a MPSC (Limitations of Functions) Regulation Sawrkarin a siamṭhat-ah Sawrkar hnalak turah Grade Pay `4400 chin hnalakna MPSC-in a kalpui ṭhin chu Gazetted leh Non-Gazetted Post thliar lovin MPSC kut aṭangin sawrkarin a la vek a ni tih sawiin hei hi an duh loh thu leh sawrkar hnalak reng reng dik leh felfai taka kalpui a nih theih nan leh Mizo ṭhalai lehkha-thiam te tan kawng zau zawk hawn theihna a nih beiseiin sawrkar chu an nawr tih an sawi a ni.

MSU hruaitute chuan MPSC kuta dah chu Mizo ṭhalai hna zawng mek, hmelhriat ṭha leh tihpuitu ṭha nei ve lote tan a him ber tih an sawi a. Mizo ṭhalai a thiam leh tlingte ngei sawrkar hnaa an luh ve theihna kawng a ni tih sawiin. Kum 2008 khan MPSC hnuai-ah dah a ni a, kum 2011 May 30-khan sawrkarin a siam danglam leh a, kum 1989 a MPSC din a nih aṭang leh hna a thawh ṭan kum 1991 aṭanga chhut-in MPSC hnalaktheih chin chu vawi-6 siamṭhat a nih tawh thu an sawi a. Sawrkar hian a duhsak zawngte inthunna remchang an zawng em tih zawhna a siam phah a ni an ti a ni.

Hetianga sawrkar-in thutlukna a siam tak avang hian MSU chuan nimin tlai khan Emergency Executive Meeting neiin an thil phut te sawrkarin a tihhlawhtlin tak avangin vawiina Aizawl khawpui chhunga darkar 12 chhung bandh huaihawt an tum chu an ṭhulh thu an puang ve nghal bawk a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram