School Education Department chuan Govt. Aided School ten an sikul sawrkarin la turin an nawr mek a, vaukhannate pawh chanchinbuah hmuh a ni a, hei hi tha a tih loh thu nimin khan thuchhuah siamin a sawi.
School Education Department thuchhuahah chuan zirlaite tana tha ber tur nia a ngaih policy nghet taka sawrkar chuan kalpui tih sawiin, tuna Mizoram chhunga sikul hrang hrang HSLC/HSSLC result aṭangtea a lan dan chuan sawrkar sikul aiin sawrkar lo sikul an tiṭha zawkin a ngaih theih a, Zirtirtuah te pawh sawrkar leh sawrkar lo sikul a thawkte inpekna thlir chuan sawrkar ni lo, kohhran, mimal leh pawlho sikul te hi naupangte zirna atana thlan zawkte an ni zawk mah pawhin a lang a ni a ti a, hetih lai hian, Sawrkar sikul hi siam belh rih tawh lova, tuna a awmsa tihchangtlun zel leh anmahni zingah pawh school ṭha neih theih nana inelna thianghlirn an neih theihna kawng remruat zel hi Sawrkar tum dan a ni, a ti.
Vanbawng khuaa headmaster an neih loh avanga lungawilohna lantir tumna a awm tih sawrkarin ‘media’ aṭanga a hriat chungchang pawh tarlangin, Vanbawngah hian Govt High School, Govt. M/S – I, Govt. M/S – II, Govt. P/S – I leh Govt. P/S – II te an awm a. Headmaster nei lo vek an ni. Anni khua lo ah pawh hian headmaster indaihlohna hi a nasa em em a. Tunah hian H/S Headmaster – 53, M/S Headmaster – 68, P/S Headmaster – 280 promotion turte ruahman mek a ni a. Hengte hi a fel hunah chuan Headmaster hi a mamawh zual hnena pek tur a awm theiin a rinawm a ti a. Chumi hma chuan nawrh vanga Headmaster in pek tur a awm chuangin a lang lo a ti bawk.