MLA Candidate zingah Crorepati mi 75 an awm

Association for Democratic Reforms (ADR) hnuaia National Election Watch te chuan Mizoram MLA candidate te affidavit aṭanga an zirchiannaah, candidate 142 zingah crorepati (cheng vaibelchhia nei tling) mi 75 (53%) an awm a, candidate te thilneih hlutzawng chawhrual chu cheng vbc. 2.31 a ni, an ti.

adrNational Election Watch te zirchianna atanga a lan dan chuan, candidate 142 ah hian chawhrualin ZNP candidate te an hausa ber a, an thilneih hlutzawng chawhrual chu cheng vbc 3.13 a ni a. MNF-in dawtin an candidate-te thil neih hlutzawng chawhrual chu cheng vbc 2.69 a ni a, INC chu cheng vbc 2.52 niin, BJP candidate-te thil neih hlutzawng chawhrual a tlem ber a, cheng nuai 10.05 a ni.

Candidate zingah R.Lalawia ZNP chu a hausa ber a, cheng vbc 68.69 a nei a, K.Sangṭhuama MNF-in dawtin vbc.25.57 a nei a, Rinzawna ZNP chu pathumna niin vbc 12.19 a nei tih an sawi. Candidate zingah hian Lengteng biala BJP candidate Zoramchhani chu a rethei ber a, `3,800/- chauh a nei a, Dampa biala BJP candidate R.Laltawnliana chuan dawtin `5,600 a nei a, pathumna pawh BJP bawk niin Aizawl W-I biala ding Kapmawia Ralte chuan `10,481 chauh a nei a ni.

National Election Watch thuchhuah tarlan dan chuan, kum 2008 inthlana candidate ni tawh kumin MLA inthlana ding leh mi 66 an awm a, heng mite thilneih hlutzawng kum 2008 a chawhrual chu cheng nuai 74.54 a ni a, kumina an thil neih chawhrual erawh chu cheng vbc 2.61 a ni a, kum 5 chhunga an thilneih punna chawhrual hi cheng vbc 1.86 niin, hei hi a percent zawnga chhut  chuan 250% a tling a ni.

Kumin inthlanpuiah hian MLA nilai zingah Serchhip leh Hrangturzo biala INC candidate Lal Thanhawla thil neih a pung nasa ber a, 2008-ah cheng vbc 2.22 neiin 2013 ah cheng vbc 9.15 a nei a, kum 5 chhunga a thilneih punna hi cheng vbc 6.93 a tling. Mamit biala INC candidate John Rotluangliana chu thilneih pung nasa ber dawttu niin, kum 5 chhungin a thilneih hi cheng vbc 5.40 a tling a, Lawngtlai West-a MNF candidate C Ramhluna chu pathumna niin, a thilneih punna chu Vbc. 5.14 a ni bawk.

MLA candidate zingah ‘criminal case’ nei 3 an awm a, chungte chu – Zoramthanga (MNF), Rasik Mohan Chakma (MNF) leh H Laltanpuia (ZNP) te an ni.

Candidate zingah ṭhalai, kum 25 aṭanga 50 inkar 61 (43%) awmin a dang 81 (57%) chu kum 51 aṭanga 80 inkar an ni a, zirna lamah pawl 10 pass lo mi 10 an awm a, Candidate 97 chu Graduate leh degree sang zawk nei an ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram