Inrinni khan Biate khua chuan Thingpui Kût an hmang a. UD&PA Minister Pu Zodintluanga chu Khuallian niin Aizawl leh hmun hrang hrang atangin Kut chhimtu ṭhahnem tak nen a khaw nawtin Kût lawmna puala programme hrang hrang te hlim taka hman a ni.
Biate Thingpui Kût lawmna inkhawm hi Zialung Community Hall-ah neih niin Kut Organising Committee Chairman, Pu H.Laldinmawia’n a kaihruai a. Khuallian Pu Zodintluanga chuan tlangram lo neia eizawng kut hnathawktuten eizawnna tlo leh hlawk zawk an neih theihna tura Mizoram sawrkarin NLUP ruahmanna a siam chu Biate khuain a takin an tihlawhtling mek a ni, tiin lawmawm a tih thu a tarlang a. He policy hnuaiah hian kut hnathawktu te kutah a takin sum a lut ta a ni, a ti.
Pu Zodintluanga chuan Biate khaw hmasawnna tura ruahmanna hrang hrang Mizoram sawrkarin a siamte tarlangin kum 2012 ah Biate sub-town plan Detailed Project Report chu central sawrkar ah theh luh a nih thu leh hei hi central sawrkarin a rawn tih hlawhtlin a beisei thu a sawi a. Tui lakna tura Biate Water Supply Scheme ruahmanna pawh central sawrkarah thehluh ni tawhin tunah hian department officer ten an umzui mek a ni, a ti a. Infiamna lama Tuichang sports hruaituten an sum indaihlohna an thlen chu Sport Council of India atangin ngaihtuah sak an nih tur thu a sawi bawk.
Pu Zodintluanga chuan Biate Thingpui Kut chuan Zoram hmun hrang hrang a mite ngaihven a hlawh hle a ni, a ti a. Thingpui chingtu te chuan Samuel Tea factory mamawh chawm thei tura thar chhuah an tihpun deuh deuh a tul thu sawiin thingpui china hmun zauh belh zel tura Biate khua in tan an lak a pawimawh thu a sawi. Tea Board of India hnuaia subsidy awm theite chu ngaihven turin thingpui chingtute chu a chah a. Hemi rual hian subsidy hmanga industry lem tam tak din a ni ṭhin chu pawi a tih thu sawiin thingpui chingtu te chuan Mizorama tea industry hmasawnna turin ṭhahnem ngai taka thawk tur leh an tu leh fate tan eizawnna rintlak hnutchhiah tum tlat turin a chah a.Kut Organising Committee buatsaih “Biate Thingpui chanchin” tih lehkhabu a tlangzarh nghal bawk a ni.
Kut lawmna in khawmah hian Pu R.Vanlalvena MLA, Chairman ZOHANDCO , Dr. Robert Rualthankhuma Project Co-ordinator, NLUP Implementing Board leh mi pawimawh dang ten thu an sawi bawk a. Chawhnu hunah Biate khaw chhuak mi hmingtha leh hlawhtlingte hnenah chawimawina hlan a ni a. Ruai leh intihlimna programme chi hrang hrang te nen Biate Thingpui Kut hi zan lam thlenga hman a ni.
Sawrkar thuchhuah tarlan danin, Biate khua hian an Lal Kairuma fapa tlangchang, Thangchuanga hmalakna in kum 1918 bawr chho atang khan thingpui chin an lo buaipui tan tawh a. Kum 1935 ah mi tam zawkin thingpui an chin theih na turin Biate khaw hnuai dai Halzawl mual chu thingpui huan atan bigha khat vel theuhvin theh a ni a.Kum 1943 chovah phei chuan Tuilut mual an tih chu theh belhin chhungkaw eng emaw zatin thingpui chin hi sum hnar pawimawh tak atan an lo hmang tawh a ni. Kum 1995 a Mizoram sawrkarin New Land Use Policy a kalpui tirh khan Biate a chhungkaw 325 in thingpui chin thlangin Soil & Water Conservation department enkawlna hnuaiah chhungkaw tam zawkin eizawn nan an hmang a. Industries department hmalakna in thingpui herna factory dinna tur ruahmanna pawh thui tak kalpui a ni hman a.Harsatna hrang hrang avangin heng hmalakna te hi a puitlin ziktluak loh avangin Biate khua a thingpui huan tam zawk chu enkawl zui lohvin hun rei tak a awm a ni.
Kum 2011 khan Mizoram sawrkar chuan NLUP hnuaiah thingpui chin hi thar thawh lehin Biate khua a chhungkaw 115 te chu thingpui chin tir an ni a. Hemi rual hian mimal hmalakna in Biate ah thingpui herna khawl changtlung tak, Samuel tea factory chu din a lo ni ta bawk a. Biate thingpui chingtu te hmakhua thlirin Mizoramsawrkar chuan NLUP atangin Samuel Tea Industry dinna tur hian a puang awmlovin cheng nuai 57 lai a puktir nghe nghe a ni. Hetianga sawrkar leh mimal hmalakna te hian Biate khua a thingpui chingtu te tan beiseina thar a siamsak a. Biate Tea Planters Society Ltd. mumal tak indinin member 325 an awm a. heng zinga 172 te chu Tea Board of India hnuaiah registered member an ni tawh nghe nghe a ni.