Zothlifim Logo
Loading ...
Mizoram NewsMizoram News

Thla leh chawhnu lama Assembly inkhawma kum thar Mizoram Budget pharh a nih dan tur chungchangah vawiin hianFinance Minister Pu Lalsawta hovin department hotute’n thutlukna an siam ang.

Finance department hotute sawi danin Planning Commission-in kum 2014-15 atana Plan sum tur a la ruahman loh avangin March ni 18 aṭanga ṭan tur Assembly Budget session-ah hian budget puitling pangngai pharh theih a ni dawn lova. Kumin sawrkar kum kallai Plan sum zat anga Budget siam a, kalpui phawt emaw thla 4 vel hman tur Vote-on-Account hmanga Assembly pawmpuina dil emaw a tih theih a. A eng zawk hi nge kalpui a nih ang tih sawi hovin thutlukna an la siam dawn a ni.

Plan sum zat tur hriat hmaa budget pharh a ṭul chuan Vote-on-account hmanga thla 4 chhung emaw sum hman phalna Assembly-a pharha dil hi kalphung pangngai a nih thu Finance department hotute chuan an sawi a. Chutih laiin kumin hi ram pum inthlan kum a nih avang leh Union Budget pawh vote-on-account a pawm a nih avangin engtikah nge Mizoram Plan sum tur hi Planning Commission-in a bithliah dawn a hriat lohva. Chutiang dinhmunah chuan budget ruahmanna fumfe nei lova vote-on-account a hun rei tak kal kha sum hman danah harsatna a siam theiniin official-te chuan an sawi a. Chuvangin kum 2013-14 Plan tiatin budget siama Finance Minister-in a pharh mai pawh awm thei a ni an ti.

Kumthar Plan a sum bithliah fel hnu-ah budget hi siam remin a ṭul chuan pawisa dil belhna Supplementary Demand pawh vawi hnih siam mai pawh tihdan lo a ni chuanglo niin Finance department hotute chuan an sawi a ni