Zan 2 riak turin, Governor Pu Vakkom B. Purushoth-aman chuan nimin khan Saiha a tlawh.
Amah hmuahna inkhawm MADC Complex-a neihah thusawiin, Governor chuan hnam hnufual leh hnam tlem zawkte hi sawrkar chuan a ngaihven renga hmasawnna an neih theih nan theihtawp a chhuah reng a ni, a ti a. India ram State dang te aia hmasawnna ropui tak awm-na chu Zirna a ni tih sawiin, District Council hrang hrang hruai-tu te pawh Aizawl ah ko khawm-in harsatna an tawh hrang te leh an hmachhawp mek te pawh a lo sawipui bakah an harsatna tawhte chu sutkianpui ngei a tum thu a sawi bawk.
Governor hian Tlawmngai pawl hrang hrang hruaitu te, Chanchin thar thehdarhtute leh Department hrang hrang hotute Circuit House Conference Hall Saiha-ah a kawm nghal a, an mamawh leh harsat-na hrang hrang a hnena an thlen te chu theih tawp a lo bawhzui a tiam a, Saiha District chu nausen thi tamna a nih laia naupang specialist -Paedia-trician leh Hmeichhe lam doctor specialist (Gynecologist) an neih loh chungchang an thlen pawh Aizawl a thlen hunah alo enzui tur thu a sawi a ni.
MADC CEM Pu RT Zachono chuan hnam hnufual te leh hnam tlem zawkte dinhmun hrechiang tur leh an harsatna te a hmun ngeia a enfiah chu lawmawm a tih thu a sawi a, Mara te tan chuan Ni chhinchhiah tlak a ni a ti.
Governor hian vawiin hian Salvation Army ten Hnuchham In ‘Orphanage Boys’ Home’ an siam leh ECM Kohhran ten ‘Motherless Babies’ Home’ an siam hmun te a tlawh dawn bakah Lorrain English School Saiha-ah Primary leh Middle School zirlai naupang te a tlawh nghal ang a, chawhnu dar Tuipui Ferry a tlawh bawk dawn a ni.
Vawiinah hian hmun hrang hrang a tlawh hnuah Lawngtlai a tlawh turin Saiha a chhuahsan ang.