Nimin chawhma dar 11 khan DC Conference Hall, Serchhip-ah District Level Fire Prevention Week hawn a ni a, District Bawrhsap leh Serchhip District Fire Prevention Committee Chairman ni bawk Pi Juhi Mukherjee, IAS chuan khuallian niin a hmanpui a ni.
Khuallian chuan thu sawiin, Mizoram chu ram kang venhimna kawngah Kohhran, Sawrkar leh tlawmngai pawl zawng zawng te ṭhahnemngai taka an thawhho theihna state awmchhun a nih a rin thu a sawi a. Mizoram sawrkar chu sum leh paiah dinhmun ṭha taka a la din rih loh avangin ram lam aṭanga kan dehchhuahte hi kan sum hnar ber an la ni a, hei vang hian kangmei laka kan vên hi a pawimawh lehzual a ni tiin kan ram neih hlutna leh a thar chhuah theih tawk lo tlahniam zel hian vênhim a ṭulzia a tilang chiang hle a ni a ti.
Bawrhsap chuan Mizoram chu thil siam chhuahna liantham kan la neih loh avangin, in kang leh ram kâng chu kangmei kan buaipui ber an ni a, chênna in kâng chu a chhan tam tak awm thei mahse ram kâng hi chu lo neih leh a kaihhnawih thilte avang a nih ber avangin hmun tinah VC te an pawimawh a ni a ti a, loneitute chu mei lam ṭha taka sial tur te, meizial bung paih kawnga fimkhur turte leh lo hâl thuah pawh sawrkar dan zawm a pawimawhzia zirtirna pe tam turin a fuih a ni.
Bawrhsap Pi Juhi chuan District Fire Prevention Committee member-te chu kangmei vên kawnga mi rem hre ber ber an nih bik lem loh avangin kângmei chhuak thei tur vênna kawnga hmasawnna tur thurawn pe duh tan englai pawhin a inhawng reng a ni tih a sawi a, police department lam te pawh tihpalh leh fimkhur lohna avanga ram tikâng an awm chuan bail theih chi ni mahse danin a phal chinah a na thei ang ber hma la ṭhin turin a chah bawk a ni.
He inkhawmah hian Pu JH Malsawma Executive Engineer, Power & Electricity Department pawhin thu sawiin, Electric-in ram leh in a tihkan theih dan te leh chumi laka kan invên dan tur te a sawi a, Mizorama electric vânga inkâng tam ber chu Internal Wiring ṭha lo leh hlui tawh te load sâng tak tak kan pek ṭhin avang te leh a ruka energy meter kal tlang lova eirawng-bawlna tura kan pawh pen ṭhinte nia a hriat thu a sawi a ni. Thu sawitu dang Pu Lalrinthanga, Manager Mizofed, Serchhip branch pawhin Eirawng-bawlna Gas fel hlel avanga kangmei chhuah theih dan te, a enkawl dan leh himna kawng te sawiin kalkhawmte zirtirna a pe a, mipuiten an hlawkpuiin an ngaihlu hle a ni.
He inkhawm hi Pu C. Lalbiaka DFO Thenzawl leh Member Secretary, District Level Fire Prevention Committee ni bawk chuan a kaihruai a, nimin vek khan Thenzawl, North Vanlaiphai leh East Lungdar-ah te week hawnna inkhawm hi neih a nih thu leh Serchhip Dis-trict chhung khaw hrang hrang-ah Awareness Campaign la neih chhunzawm zel tur a nih thu te a sawi a, sawrkarin kumin-ah lo hal hun a siam chu March ni 15 hma lam a nih thu leh lo hal niah pawh chawhnu dar 3 hnu lam chauha hal phal a nih thu a sawi bawk a ni.
Inkhawm zawh hian DC Video Conferencing Hall-ah kangmei ven chungchang TV Talk Show neih nghal a, he inkhawmah hian Mizo Idol 2014 3-na Lancy Remlalhruaii leh 2012 Runner-up Lalbiakmuana te bakah zaithiam dangten kalkhawmte zaiin an awi bawk a ni.