Hmarchhak mi te ramchhunga an himna tura hmalakna tur kawng hrang hrang duang turin sawrkar laipui chuan nimin khan commitee a din.
Indian Civil Service Officer hlui, MP Bezbaruah a kaihhruai member 6 awmna committee hian, hmarchhak mi te chunga tharum thawhna thleng ṭhin leh chi inthliarna hawi zawnga enhranna an tawh ṭhin dan an zirchiang ang a, thla 2 chhungin an thil hmuhchhuah te sawrkar thuneitute hnena thehlut tura hriattir an ni.
Nimin vek khan Congress Vice President Rahul Gandhi chuan Union Home Minister Sushilkumar Shinde hmuin, hmarchhak mite enhranna leh an chunga tharum thawhna thleng thin ven dan tur a sawipui a, he meetingah hian Hmarchhak bial MP te pawh an tel a ni.
Hmarchhak bial MP te hian Prime Minister Dr Man-mohan Singh hmuin, Arunachal tlangval Nido Tania tualthihna chungchang an sawipui a, North East MP Forum a Vice Chairman Khagen Das an ho in hmarchhak mite enhranna tawh thin thu te an thlen a, Prime Minister chuan an harsatna thlen te chinfel dan ngaihtuah tura hmalak a lo tiam a ni.
Nimin vek khan Delhi khawpuia hmarchhak zirlai te chu pung khawmin Arunachal zirlai Nido Tania thahna a inhnamhnawih te hrem ngei an phut thu an auchhuahpui a ni