Kolasib District-ah Oil Palm Ha. 5327-a zau-ah ching tawh

Sawrkar ṭanpuinain Kolasib District-ah tunah hian, loneitu 1500 bawr velin Oil Palm an ching mek a, kum 2005 aṭang khan ching ṭanin, khaw 34 velin ram Ha. 5327 a zauvah an ching a ni.

Kolasib ah hian Zonal Committee leh Oil Palm Growers Society te dingin infuih tawnna hun te an hmang ṭhin a, niminpiah khan Kolasib-ah Oil Palm Farmers Meet an nei a, Horticulture changtu Parliamentary Secretary Pu K.Lalrin-thanga’n a hmanpui a ni.

oil palmHetihlai hian, Oil Palm rah sawngbawlna tur, Bukvan nei-a Oil Palm Mill bun mek chu hun rei loteah zawhfel beisei a ni a, a khawl buntu Godrej Agrovet Company hotute hi niminpiah khan Pu Lalrinthanga hian kawmin, ruahman anga March thla tira hawn theih ngei a nih dawn leh dawn loh a zawt a, anni chuan hawn theih a ni dawn nge dawn lo an chian loh thu sawiin, hma chak taka an lâk mek thu a sawi a ni.

Oil Palm Mill hi a nih anga khawl tlantir turin Company chuan Generator pahnih 200 KVA ve ve a bun mek a, hei bakah hian Transformer 500 KV a bun tawh bawk a ni. Nitin darkar 8 chhung her thei tura ngaih a ni a. Amaherawhchu tun dinhmuna Oil Palm thar chhuah dan en hi chuan ni khatah darkar 4 daih her thei tur ang vel an ni tih Gogrej hotute hian an sawi a. Oil Palm chingtu a rah thar ṭan mekte an awm zel bawk avangin hriak her tur hi a pun chhoh zel erawh beisei a ni.

Oil Palm her chhuah sa Crude Oil chu Mizoram pâwna a thlitfimna hmunah thawn ṭhin a ni dawn a ni.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram