Mizo Students’ Union (MSU) chuan February ni 5, 2014-a Lengte khaw bula Iron Rod siamna ISPAT-a inhlawh Lengte nu pakhat, hmeithai nia sawi ISPAT hnuaia thawk Katan Biswas (19)-in pawngsual tuma a khawih chu an duh loh thu leh ISPAT hotupa Sharma pawh hmeithai khawihtu Biswas hnena pawisa pea tlanbotir a tum avangin ISPAT chu titawpa Sharma chungah pawh a na thei ang bera hremna lekkawh turin Mizoram sawrkar a ngen.
MSU chuan tun hma aṭangin ISPAT hotupa Sharma hian ISPAT-a Mizo hnathawktute chungah hian harsatna a siam fo ṭhin nia an hriat thu sawiin, tuna hetiang thil duhawm lo tak a thleng leh ta hi Mizote a hmuhsitna nia an ngaih thu an sawi a, Mizoram chhung ngeia hnam dang hnathawkte’n Mizote chunga harsatna an siam fo a nih chuan Mizoram-a hnam dang pawisawilo tam tak awmte pawhin an tawrh ni a thleng ang tih an hlau tih an sawi a, Mizoram chhung ngeia hnam dang sumdawngte an lian tulh tulh chu nakin hun thlirin kan ram leh hnam tan a pawi thei dawn nia an hriat thu an sawi a, chuvangin Mizoram sawrkar pawh ngaihtuah nasa zawka hmang turin an ngên a, ISPAT Industries Private Ltd. chu vanduaina tawk hmeichhia hnenah a rang lama zangnadawmna cheng nuai hnih aia tlem lo pe turin an hriattir bawk a ni.
Lengte khawtlang hruaituten sawi danin, Nilaini chawhnu lam khan an khaw nu, hmeithai fa 4 nei, Mizoram Ispat Industry a hnathawk chu Toilet a silfai laiin, Katan Biswas hian pawngsual tum ni ngeia ngaih theih turin mawilo takin khawih a tum a, an thawm hria in Ispat a hnathawk dangte pawh an pung-khawm nghal a. An khaw nu mawilo taka khawih tum a nih thu an hriat hian Lengte khawtlang mipui thahnemtak te chuan Ispat hmun hi an pan nghal a, hetianga khawtlang mipui lungawilo thawm an hriat hian Ispat Industry a an head manager Sharma chuan Katan Biswas hi a damlo tih chhuanlam a hmangin an driver pakhat chu an company motor hmangin Sairang thleng motor a va thlah a, Sairang atanga motor remchang dang hmanga Silchar a thawn turin a tir a, hemi hnu mipui lam nawrna avangin Katan Biswas hi hruai kir leh turin midang a tir leh a, heta ṭang hian Katan Biswas hi Sairang Police ten an lo la ta a ni.
Hetianga pawikhawih tumtu hum alo tum avang hian Nilaini zan zanrei lam khan khawtlang mipuite ngenna angin head manager Sharma hi Sairang Police ten an la a, he thu ziahlai hi chuan chhuah leh tawh a ni. Hetihlai hian manager hi Lengte khawtlang mipuiten Ispat a thawk chhunzawm tawhlo tura an ngenna angin, Ispat hi a chhuahsan nghal dawn nia thudawn a ni bawk.
Hetianga an khaw nu mawi lo taka khawih tum a nih avang hian Lengte khaw mipui thahnemtakte chu Nilaini zan khan Ispat hmun-ah hian pung-khawmin boruak pawh a sosang hman viau a, nimahsela thil pawi dang engmah thleng zuilo in, zan dar 10 vel khan mipui pungkhawm te hi an ṭin darh thei ta a ni.
Nimin chhun dar 11 khan Ispat hotute leh Lengte khawtlang hruaitute chuan Jt. Meeting neiin, hetah hian Lengte khawtlang hruaitute chuan Ispat Industry a Labour Rules an neih te a nihna anga kengkawh tura Ispat hotute an phut thu te, Ispat Industry leh Lengte khawtlangin Agreement an siam, a nihna anga kengkawh tura an phut thu te Ispat industry hotute hnen-ah hian an thlen a ni.