Minister hlui, Pu R.Tlanghmingthanga chu Assembly inthlanpui a chuh dawna Affidavit a thehluhah thudik lo tarlanga puh a nih avangin nimin khan Aizawl Polce ten an man a, bail-a chhuah leh nghal a ni.
Tarlan tawh angin, Pu Tlanghmingthanga hian Nikum December thla-a Assembly inthlanpui, Aizawl South-II bial aṭanga a chuh dawn khan Affidavit a thehluhah thubuai neilo angin a inziak a, thubuai neilai a ni tih hriatchhuah a nih hnuah nikum November thla khan Mizoram Chief Electoral Officer chuan Election Commission a hriattir zui a ni.
Hemi chungchangah hian Aizawl south-II Returning Officer chuan Aizawl Police Station ah FIR thehlutin nikum december ni 14 khan thubuai ziahluh a ni a, thubuai chhuitu Case Investigation Officer dilna angin, Chief Judicial Magistrate chuan niminpiah khan Pu Tlanghmingthanga man phalna, Warrant of Arrest hi a tichhuak a ni.
Pu R Tlanghmingthanga lakah hian IPC Section 177 na tlawhchhan leh Representation of Peoples Act 1951 Section 125 (a) leh 33 (a) te tlawhchhana thubuai ziahluh a ni.