Cosmetic hmanah fimkhur ngai

Health Services Deptt. hnuaia Drugs Administration Wing (DAW) chuan mipuite chu cosmetics hman kawngah fimkhur tur leh, a bikin ‘ngona’ atana ṭha nia sawi larte chu a him leh him loh ngaihtuah hmasa lova hmang mai lo turin a hriattir.

Tunlai hian cosmetics hrang hrang hman an intihhmuh hle a, a bikin ṭhalai ten ‘ngona’ nana cosmetics hman an uar hle tih DAW thuchhuah chuan a tarlang a. Centre for Science and Environment (CSE), New Delhi in hemi chungchang zir bing tur mithiam a ruat ten, Pollution Monitoring Laboratory, New Delhi-ah company hrang hrang siam cosmetics – Fairness Cream, Anti-ageing Cream, Lipstick leh Lip Balm-te an zirchiannaah chuan, cosmetics tam takah mihring taksaa tawrhna thlen thei heavey metals- lead, mercury, cadmium, chromium leh nikel te chu a him chin piah lam an tel niin a sawi.

DAW chuan, “Heng heavy metals te hian mihring taksaah vun natna hrang hrang bakah thâwkna dâwt, chuap, kal, pumpui leh rilah te nghawng ṭha lo neiin, cancer an thlen thei hial a ni,” a ti.

Hetih lai hian, Mizoram Food & Drugs Control Prog-ramme hnuaia Drugs Controller te chuan, kum 2013-2014 chhungin Aizawl khawpui chhungah damdawi dawr hrang hrang, dan loa damdawi hralh chhuak dawr 33 te license an tih-tawpsak tawh a, dawr 76 chu ‘show cause notice’ pek niin, dawr 6 te chu court thubuai siamsak an ni tawh bawk a ni.

-zalen.co.in