Lok Sabha inthlan neih tura MPCC Candidate Pu CL Ruala’n Mizoram leihnuai hauhsakna haichhuah hna kalpui mek chu nasa zawkin bawhzui a tum tih a sawi.
Pu CL Ruala chuan tuialhthei leh gas zawn hna hi hmarchhak bial state hrang hrangah thawh mek a ni a, State dangte Mizoram aiin an verh hnem tawh a, chung zingah chuan hlawhtlinna an hmuh rualin Mizoram-ah hmun khat chauh an verhah pawh hlawhtlinna hmuh nghal a ni a, hmun 5 vela verh leh tum mekah pawh hlawhtlin ngei beisei a ni a ti a, mithiamten map an siamah Mizoram leihnuai hi Hydro Carbon in a dapchhuak vek a, oil emaw gas emaw chu a awm ngei dawn tih a chiang a ni a ti a, ram chhengchhe tak hmuna awm chu engtikniah emaw chuan mi ram awh a la ni thei dawn a ni a ti.
Pu CL Ruala chuan Standing Committee on Energy-a member a nih hnuin an hmachhawp zingah Tuirial Hydel project hman theiha peihfel pawh a tel tih a sawi a, nakumah hman theih a nih a rin thu leh Tuivai Hydel Project hna kalpui mek, Megawatt 210 pe chhuak thei tur chu Power Minister a nih laia clearance nei tawh a nih thu leh tunah hian PPP a tih theih na turin Central Sawkar in cheng Vaibelchhe tam tak a pe tawh tih a sawi bawk.