Nimin nileng khan Directorate of Disaster Management & Rehabilitation leh Serchhip District Disaster Management Authority te ṭangkawp buatsaihin Serchhip DC Conference Hall-ah Chhiatrupna lo thlen palh a chet lak dan tur India sawrkarin a duan thar “Incident Response System (IRS)” chungchang zirho niin District chhunga sawrkar Pisa hrang hrang aiawhte leh Tlawmngai Pawl hrang hrang aiawhte an tel ṭha hle a ni.
Nimina he Training hawng tu District Bawrhsap, Serchhip District Disaster Management Authority Chairman ni bawk Pi Juhi Mukherjee, IAS chuan March ni 6, 2014 a Serchhip-a Mega Mock-Drill neih tur ah Incident Response System hi hman anih dawn avangin uluk taka zirchiang turin kalkhawmte a chah a, District pawn leh State pawn aṭanga Observer 18 lai an rawn kal dawn avangin fimkhur tak leh hnehsawh taka kan chanpual ṭheuh te kan tih a ngai a ni a ti bawk. Serchhip District chhunga Chhiatrupna lo thlen tak tak hun pawha hmalak dan tur a nih avangin mi zawng zawng kan pawimawh vek a ni a ti a, mawhphurhna nei ten an hna chiang taka hriaa an hnuai amite zirtir chhawng thei tura inbuatsaih turin a ngen a, thuthar thehdarhtute leh Tlawmngai pawl te chu mipuite hnenah Mock-Drill neih tur pawimawhzia hrilhfiah tur leh phur taka thlawp tura ngenna siam turin a chah bawk a ni.
Nimina “Incident Response System (IRS)” Training hun hniha ṭhen a ni a, chawhma lamah Incident Response System chungchang leh kalphung te zir niin Pu Lalhmunsanga Hnamte, MCS, Joint Director, DM&R in zirtirna a pe a; chawhnu lamah Pu Zothansanga, District Co-ordinator, DM&R in Incident Response System-a mawhphurhna neite leh an hnathawh tur chi hrang hrang zirtirna hun a hmang a ni.
Tarlan tawh angin March ni 13, 2014 hian Serchhip-ah “Mega Mock-Drill” (Chhiatrupna thlen thulh a chet lak dan tur lemchan) India hmarchhak State dangte rualin neih a ni dawn a, hemi atan hian Serchhip khawpui huam chhunga hmun derthawng zual 5 thlan chhuah a ni a, Mega Mock-Drill neih hunah hian National Disaster Management Authority, State Disaster Management Authority leh District hrang hrang aṭanga Observer 18 an tel dawn bakah National Disaster Response Team te, Mizoram Police, 14 Assam Rifles, Sawrkar Department hrang hrang bakah Volunteers 100 chuang an tel dawn a ni.
Nimina Incident Response System Training hi Pu F.J.Liantluanga, MCS, Project Director, DRDA Serchhip in a kaihruai a, Serchhip-a Sawrkar pisa hrang hrang aiawhte bakah, Tlawmngai pawl hrang hrang aiawhte an tel a, Training zawh hnu hian sawihona hun benglut tak hman niin Pu Lalnunfela Chawngthu, MCS, SDC in lawmthu sawina hun hmangin hnu a khar a ni.