Zothlifim Logo
Loading ...
Mizoram NewsMizoram News

India hmarchhak pum huap UPC |halai inkhawmpui, General PYD Conference vawi 36 na, April 3-6,2014 chhunga neih tur chu a hmunhma lamah engemaw harsatna awm avangin sawn a ni.

Thudawn danin PYD khawmpui hi College veng/Venghlui field a neih tum a ni a, PYD lam hian College veng Local Council ah dilin annin an remtih hnuah March 12 aṭang khan hnatlangin pandal sak hna hi ṭan a ni a. Mahse Zirtawpni khan Venghlui Local Council te chu pandal sakna hmunah hian kalin an hnena dilna thehlut ve turin an hriattir a, PYD hruaitute pawh hian Inrinni tuk khan an thehlut ve nghal a. Thil ṭhalo zawk leh veng boruak siam thei thil a awm nia hriain Inrinni chhun khan PYD lam chuan an pandal siam hi an ṭhiat leh ta a ni. Thudawn danin PYD hian a hranpaa pandal siam lovin Bethlehem biakin ah emaw Zemabawk Vengpui ah emaw khawmpui hi nghah mai nise an ti.

Venghlui Local Council Secretary Lalzawmliana Pachuau chuan PYD khawmpui neih chu phallohna leh danna an neilo tih a sawi a. Field chungchangah College veng nen hian inrawntawn tur kan nih laia anmahni thu thua thil an ti ṭhin hi kan duhlo a ni, a ti.

College veng Local Council Vice Chairman C.Lalmuanpuia chuan pandal sak uaih tawh ṭhiah leh a ni chu zahthlak a tih thu a sawi a, field chungchangah inrawntawn tur tih engmah a awm lo niin a sawi ve thung. PYD te hian pandal structure hi Central YMA ta an hawh a ni a, a sak nan hian tha 300 vel bakah pawisa cheng nuai 2 vel an seng tawh a ni.