Thil hriatsual palh vang a ni: R.Tlanghmingthanga

Nimin khan Mizo Hnam Run inkhawmah Pu R.Tlanghmingthanga, Vice President (Ex-Health Minister) chuan thusawiin, “Kum 2013 Mizoram MLA Election-a Nomination ka file na a, case nei tawhlo anga Declaration ka siam kha thil hriatsual palh vang a ni,” a ti.

Pu Tlanga chuan, “Health Department hnuaia Ayush Building saknaah thil diklo awm anga puhna a awm avangin case siam a ni a. He case hi ngun taka ngaihtuah a nih hnuah, ni 29 July, 2013 khan Final Argument neih a ni a, Judgement order siam tawh mai tur a nih avangin, Court-ah inlan leh tulna pawh a awm tawh lova. Judgement order hi Dan ang chuan Final Argument neih aṭanga thla khat chhunga siam tur tih a ni a. Nomination ka file dawn pawh khan fimkhur thuah ka Ukil pawh ka zawt a, case a tawp tawh tih min hrilh angin, ka Declaration ah khan case neilo (Nil) angin ka Declaration kha ka siam ta a ni.

MLA Candidate tur hian Dan-in a phal angin case nei lai pawhin Nomination a file theih tih chu tlang hriat a ni a, engvangmahin ka case neih hi a la nung tih hria ila zep leh thup a ngaihna chhan tur a awm lova. Case neih zep tum lam a ni lova, hriatsual palh vang liau liau a ni,” tiin a sawi tih MNF thuchhuah chuan a tarlang.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram