Zothlifim Logo
Loading ...

Tun Lok Sabha inthlan lo awm tura Tripura a Tuikuk Vote thlak tir tum duhloh lantirna Protest Day nimin khan Aizawl ah hman a ni.

He hunah hian mi ṭhahnem tak an pungkhawm a, Central YMA huaihawta NGO hrang hrangin an thlawp he Protest Day ah hian, Millenium Center kawt aṭanga kawngzawh ṭanin Vanapa Hall-ah an tawp a, kalkhawm te chuan resolution siamin, anmahni duhthungeia Mizoaram chhuahsan te, vawi tam tak let tura koh an nih hnua kir duh lo te vote thlakna tur Election Commision of India a buatsaih chu an dem thu an sawi a, ti lo tura an ngen nawn thu tarlangin, Inthlanna hi buatsaih sak luih a nih chuan an do chhunzawm zel tur thu te, Tripura-a Tuikuk vote an mamawh loh thu te, an let duhlo a nih chuan an awmna hmunah awm hlen se, an vote pawh chhawm zui mai se an tih thu leh tun ṭum Inthlanah hian Political party tinte chu Tripura Camp-ah vote zawnga campaign lo tura an duh thu te an pass a ni.

protest dayThusawitu hmasa ber, MUP Gen. Secretary Pu Sainghinga Sailo chuan “Bru te chu tunhma chuan Mizoram khua leh tui nihna nei an ni ngailo a, tunhnai ah Mizo mipuite’n an khawngaih avangin Mizoram khua leh tui nihna an pe a, hetianga Mizote an tibuai reng hi a pawi hle e, mikhual châm rei mai an ni tih inhria se an duh tih a sawi.

MZP President Lalhmachhuana chuan, Mizo mipuite an ṭanrual chuan Tuikuk te pawh an duh ang ngeiin an awm tir theih a rin thu a sawi a, hmanlai pi leh pu ten huaisen taka an lo hum Mizoram chu thangthar ten an humhim zel tur a ni,” a ti bawk.

MSU President Zodinpuia chuan, “Tuikuk te chu Sawrkar laipui in Representation of People Act 1951 hnuaia Section 60-in a sawi, Kashmir aṭanga raltlan Kashmiri Pandit te nen ang khatin en tawhlo se a duhthu sawiin, Tuikuk te chu an duhthu a Mizoram chhuahsan an ni a ti a, India Union hnuaiah Mizote an himlo a nih chuan kawngdang kan dap a ngai ang,” a ti bawk.

MHIP Vice President Dr.Thanpuii pawhin thu sawiin, “Tuikuk te Tripura-a ûm zui reng chu hriatthiam theih a ni tawhlo tih a sawi a, Tuikuk te hetianga ngaihtuah an nih chuan Mizoram pâwn a Mizo zirlai leh hnathawk tamtak awmte pawh ECI chuan vote an thlakna tur ngaihtuah ve se a duhthu a sawiin, Mizo hmeichhia te hian theihtawpin hma a lazel dawn a ni,” a ti.

Central YMA President, Pu Lalbiakzuala chuan, “Tuikuk ten Lok Sabha inthlanah vote an thlak lohna tura an hmalakna chu a bul ṭanna chauh a ni a, a hlawhtlin theihnan a tawp thlengin an dodal zel dawn a ti a, Political Party te hnenah ngenna thlenin Tuikuk vote beiseiin tu party mah Tuikuk khuaah kallo turin an ngen a ni a ti a, kal lui an awm a nih chuan an chungchang Jt.NGO meeting in a ngaihtuah ang a ti bawk.

Kohhran hrang hrangte pawn member tam duh vangin Tuikuk te tlawn tawhlo tura a duhthu sawiin, India hnuaiah Mizote hi an him tawhlo a nih chuan kawngdang an zawn a ngai ang a ti bawk a ni.

Joint NGO Co-Ordination Committee hian hmalakzel dan tur ngaihtuahin naktuk hian thutkhawm leh an tum a ni.