Thenzawl Playground-a Serchhip District Football Championship khelh mekah vawiin hian Pool Match khelh zawh a ni dawn a, vawiina match hnuhnung ber, chawhnu dar 2 aṭang hian Quarterfinal khelh ṭan a ni nghal dawn bawk.
VAWIIN FIXTURE
RMFC, TZL V Hmar Veng FC 10:00am
Chekawn FC V Dinthar FC 12 noon
Quarterfinal
AWC FC V Zote FC 2:00pm
RMFC, Thenzawl v Hmar Veng FC
Pool C-ah hian Keiṭum FC chuan an khelh tur khel zo tawhin, match 2-ah match 2 an chak a, Pool Winner an ni tawh a, vawiina match hmasa berah RMFC, Thenzawl leh Hmar Veng FC te hian Runner-up dinhmun an inchuh dawn a, a chak zawk zawkin Quarterfinal an lut dawn a, an in-draw chuan Hmar Veng hian goal thun (GF) an neih tam zawk dawn avangin Quarterfinal an lut dawn a ni.
RMFC, Thenzawl hi an home-a khel tur an ni a, an chak zawh loha an tlak theih dawn avangin chak ngei tumin an khel tawh dawn a, vawiin hi Holiday a nih avangin fans lam pawh an neih nual a rinawm. Hetihlai hian Serchhip Football Club zinga a ṭha pawl ni reng thei leh boruak nei lian ṭhin tak, District Championship neih tur atan pawha inpuahchahna ṭha tak nei, Hmar Veng FC hian Pool Match paltlang lova tlak mai chu an tum mai hmel bik si lova, chuvangin hemi te pahnih inkhelh tur hi a hmuhnawm ngei a rinawm.
Chekawn FC V Dinthar FC
Hemi te pahnih pawh hi Quarterfinal la lut thei ve ve an ni a, amaherawhchu Dinthar FC dinhmun hi a ṭha zawk a, Chekawn FC hi chak mahse 3-0 tala an chak a nih loh chuan Quarterfinal luhna chance an nei thei dawn lo a, an khelh tur khel zo tawh E.Lungdar FC hian point 3 an nei chungin vawiin inkhel result a zirin an tla thei a, amaherawhchu, E.Lungdar FC hi tla tur chuan Chekawn FC hian 4-1 vel tala Dinthar FC hi an hneh a ngai dawn a ni.
AWC FC V Zote FC
Vawiin chawhnu dar 2-a Quarterfinal Match hmasa ber khel tur AWC FC hi Serchhip First Division Club hlun an ni a, Pool Match-ah chak loh nei lovin goal 6 an thun thei a, hetihlai hian an hmachhawn tur Zote FC pawh hi Serchhip First Division Club, Chhiahtlang Kawn Veng FC hneh thei an nih avangin Club chhia an ni lo tih a chiang a, hemite pahnih inkhel tur pawh hi a hmuhnawm a rinawm.