Lai Autonomous District Council hnuaia Village Council 93-a inthlan vawiina nei turin inbuatsaihna peih fel vek a ni tawh a, Vote nei ten vote an thlak ngei theih nan Governor chuan LADC huam chhung atan vawiin hi chawlh ah a puang a ni.
Vote hi zing dar 7 aṭanga tlai dar 4 thleng thlak tur a ni a, Village Council 93 zinga 8-ah candidate-te chuhtu awm lova tlinga puan an lo ni tawh a ni.
He inthlanpuiah hian hmeichhia tan seat hauh sak chuh turin mi 205 in hming an pe a, heng zinga 8-te chu chuhtu an awm loh avangin tlinga puan an ni a, heti hian hmeichhia seat hauhsak bik 85 luah khat turin hmeichhe candidate 197 an awm a ni.
A pumpuia inthlanna hmachhawn tur candidate awm zat chu 1059 an ni a, he Village Council inthlanpui neihna tur khaw 85 ah hian voters 43,823 an awm a, heng zinga hian mipa 21,454 leh hmeichhia 22,369 an awm a ni.
Inthlanni a vote chhiar nghal lova April ni 12 chhiar tur a nih avangin Ballot Box zawng zawngte hi Lawngtlaia BNGRSK Hall Storage Centre -ah phurh khawm vek a ni ang a, Ballot Box-te phurkhawmtu tur motor-te leh a venghimtu tur Police-te pawhin nimin khan Lawngtlai an chhuahsan vek tawh bawk a ni.
He inthlanna tana Model Code of Conduct kenkawh chungchangah Pathianni thlengin Commission chuan complaint engmah a la dawng lova, dan leh thupek kenkawh kawngah pawh harsatna engmah report dawn a ni lo bawk.