Mizoram News

PRISM-in Debate neihpuiah cho

Prism chuan nimin khan Lokayukta chungchanga mipui hmaa debate neih puia Lokayukta Drafting Committee chona Law Minister Lalsawta hnenah an thlen.

Nimina PRISM thuchhuah chuan Mizoram sawrkarin Lokayukta Bill a siam chu hman tlak miah loh, eiru man thei miah lo tur, eiruk do leh ven tumna aia eirukna tihluar zawk tur leh Mizoram sum harsatna nasa taka tizual tura an ngaih thu an sawi a, Dan tha a awm theihnan rawtna vawi thum an thlen tawh thu leh March ni 3, 2014-a Law Secretary Office Chamber-a Lokayukta Drafting Committee te nena he Bill enhona aṭangin Drafting Committee-a tel te ngaihdan leh thusawi te’n thiltha tih tumna nei lova an ngaih avangin Bill ennawntu Committee an siam aṭangin an inhnukdawk tawh tih an sawi a. Nimin khan Law Minister Office Chamber-ah Bill hi enho leh tura ruahman niin hetah hian tel tura sawm an ni a, amaherawh chu, “A hmaa kan lo sawiho tawh naa i Drafting Committee member te ṭawngkam leh ngaihdan sawi te kan ngaihtuah in, i Drafting Committee hian Dan tha, eirukna titlem ngei tur duan chhuah tumna leh, Mizoram sum dinhmun tha lo zual zel tur ven tumna an nei miah lo-ah kan ngai a. Chuvang chuan, anni nena mipui hmuh lova sawiho leh hi kan duh tawh lo a. I Drafting Committee nena mipui hmuh theih ngei tura debate kan chak hle a. Hun remchang min siamsak turin kan ngen nghal che a ni,” tiin Law Minister hi ziakin an hrilh a ni.

Hemi rual hian Bill siamṭhat an duh dan te hrilh nghalin, “I hnena ’The Mizoram Lokayukta Bill, 2014’ siamthat kan duh dan kan han thlen te leh public debate neih kan rawtna te hi tihhlawhtlin a nih chuan kan lawm em em ang,” tiin Law Minister hnena an thu thlenah hian an ziak lang bawk.

Editor

C.Lalrochhuanga, New Serchhip, Serchhip - 796181 Mizoram Contact: WhatsApp | Phone Call | Telegram