Selam Bialtu, Parliamentary Secretary Pu TT Zothansanga chuan niminpiah khan Selam khua a tlawh a, tunhnai lawka Selama buaina thleng chungchangah khaw mipuite nen inkawmhona hun a neihpui.
Pu TT Zothansanga chuan, buaina thlen hun lai a, Sawrkar programme pawimawh a awm avangin Aizawl a chhuahsan theih loh thu sawiin, a theih veleh a kal thu a sawi a, khaw mipuite hriatthiamna a ngen nghal a ni. Ama bial a thil thleng a nih avangin thil thlen hun pawh hian sawrkar hotute leh Home Minister ngei pawh a biak dante sawiin, thil thleng chungchanga mipui leh nunaute venghim tur leh buaina punlun thei tur veng tura Police te pawh tirh a nih tawh thu an lo hrilh thu a sawi a. Hetiang boruakah hian Politics a vir vel thei a, dawt thuthang dik lo tak tak te pawh a awm theih avangin tun aṭang chuan khaw mipuite an fimkhur a ṭul a ni a ti a, khaw mipuite chu a ngaihsak reng thu sawiin, amah pawh an hmalakna te hriattira finchhuah zel turin a chah bawk a ni.
Tuna Champhai District Jail a tang mek te chhuah chungchang an sawipuinaah Pu TT Zothansanga chuan theihtawp a hma lakpui a tum thu sawiin, hemi chungchangah pawh hian hotu hrang hrang biaa hma a lakpui dan a sawi a, Forest hruaitute nen inkawmna an neih thu kalkhawm te hnenah hian a sawi bawk a ni.
Selam khaw mipui aiawhin Pu Thangzazena leh Pu MK Lala te pawhin thu sawiin an harsatna tawh hunlai a an ngaih ber chu an MLA niin tuna a hmel a rawn lan thei chu an thla a muan thu an sawi a. Police bo chungchangah pawh an rilru a hah thu leh khawtlangina an zawnpui dante sawiin, thuthang tam lutuk avanga inven thiam a ṭul thu te an sawi bawk a ni.
Pu TT Zothansanga hian nizan hmasa Dar 8:00 khan Champhai Sub-Headquarter YMA hruaitute kawmin Selam chungcha ng hi a sawipui a. Nimin zing dar 10:00 khan Champhai DC hotu dangte hemi chungchang sawipuiin a kawm bawk a ni