Kuminah Meth mûm 15,000 man tawh

Mizoram Excise & Narcotics department chuan kumin January ni 1 atanga April ni 30, 2014 inkar chhung khan damdawi hlauhawm Methamphetamine (Meth) mum 15,000 an man a, hetihlai hian kum 1995 atanga May ni 5, 2014 inkar chhung khan Mizoram ah damdawi hmangsual vang thi mi 1208 an awm.

Excise & Narcotics deptt. chhinchhiah danin, nikum 2013 chhung khan tunlaia ruihhlo siamna atana hman nia hriat Pseudoephedrine mum 18,903,478 leh Methamphetamine mum 613 an man a, kum 2012 khan Pseudoephedrine mum 31,183,517 man bawkin, 2011 khan Pseudoephedrine mum 8,450,130 an man bawk a, hemi kum hmalam hi chuan Pseudoephedrine leh Methamphetamine hi man an neilo niin an record ah tarlan a ni.

Excise & Narcotics department bik ringawtin kumin January atanga April ni 30 inkar chhung khan Pseudoephedrine atanga siamchhuah ni a rin Methamphetamine mum 15000 an man tawh a, hemi hunchhung hian MLTP act vanga thubuai siamsak mi 682 an nei tawh bawk.

Record an neih Kum 1995 atanga kumin May ni 5 (kum 19 leh thla 5) inkar chhung khan Mizoramah damdawi hman sual vanga thi mi 1208 chhinchhiah an ni a, kumin 2014 ringawt ah pawh damdawi hman sual vanga thi hi mi 21 an awm tling tawh tih Mizoram Excise & Narcotics department record ah hian tarlan a ni.

Mizoram Excise & Narcotics deptt. hian kumin January atanga April ni 30 thleng khan Zu leh a kaihnawih atanga sum an hmuh (Foreign Liquor & Spirit/ Fines & Confiscation/Other receipt) chu ₹93,47,925.00 a tling tawh a, hemi hunchhung hian Razu litre 9015.640 man tawhin, Zu bilhlai tin 17747 (1/2) leh Dawidim/Yeast kg 25.800 an man tawh a, hemi hunchhung vek hian Sap Zu (750 ml) um 24836 man an nei tawh bawk.

Kumin January aṭanga April ni 30 inkar chhung khan ND&PS Act (Narcotics Drugs & Psychotropics Substances Act, 1985) vangin mi 79 te chu thubuai siamsak an ni a, AD(C) Act (Assam Drugs (Control) Act, 1950) vanga thubuai siamsak mi 10 awm bawkin, ME Act (Mizoram Excise Act, 1973) vanga thubuai siamsak mi 161 an awm tawh bawk.